Ubutunzi ntibwifashe neza muri Espagne na Slovenia

Umuryango w’ubumwe bw’ibihugu vya buraya waburiye ibihugu vya Espagne na Slovenia ko ari vyo bihugu mu biwugize ubu vyugarijwe kurusha ibindi n’ibibazo bikomeye vy’ubutunzi bikenewe kuronkerwa umuti vuba vuba.

Icegeranyo c’uwo muryango ku buryo ubutunzi bumeze mu bihugu biwugize gitunga agatoki amadeni akomeye y’igihugu ca Espagne n’ubushomeri bukomeye buhari.
Ubu abantu barenze kimwe ca bibiri c’abanyagihugu ba Espagne bari munsi y’imyaka 25 babuze akazi.

Hagati aho kandi, umuryango mpuzamakungu witaho ubutunzi kw’ isi, OMC, waratangaje ko ikibazo c’ubutunzi kivugwa mu bihugu vya buraya bibangamiye iyongerezwa ry’ubutunzi kw’ isi.
Uyu muryango wagabanije ibitigiri vy’ukuntu ubona ubutunzi bwokwiyongera kw’ isi mu myaka iri imbere uvana ku bice 4.5 kw’ijana igera ku bice 3.3 kw’ijana .