Accueil > Amakuru > Mu makungu > Ubwongereza bwahagaritse ingingo yo gutera Siriya
Ubwongereza bwahagaritse ingingo yo gutera Siriya
vendredi 30 Myandagaro 2013
Abashingamateka mu Bwongereza bahakanye ingingo yo gutera Siriya mu gihe ikekwa gukoresha ibirwanisho vy’ubumara ku banyagihugu.
Umushikiranganji wa mbere David Cameron yavuze ko azokwubahiriza ivyo abashingamateka bahisemwo, aho "oya" yaronse amajwi 285 kuri 272 ya "ego". Ubwongereza rero ntibuzokwidikanya na Amerika mu bitero.
Amakuru dukesha BBC amenyesha ko Amerika yavuze ko izobandanya kuvugana n’Ubwongereza kuri iyo ngingo, mu gihe arico gihugu bifitaniye ubucuti igihe kirekire.
Umukuru w’umugambwe Labour utavuga rumwe na Leta, Ed Miliband, yavuze ko ubucuti hagati y’Ubwongereza na Amerika budategerezwa kuba gusa gukora ivyo umukuru wa Amerika ashaka.
Aho yavugana na BBC mu kiganiro Newsnight, umushikiranganji w’Ubwongereza ajejwe kwivuna abansi, Philip Hamond, yamenyesheje ko Leta y’umukuru w’igihugu Assad ica yumva igize agahengwe kubera iryo hitamwo ry’abashingamateka b’Ubwongereza.
- Umushikiranganji w’Ubwongereza ajejwe kwivuna abansi, Philip Hamond
Ingingo yo gutera Siriya yashikirijwe na Amerika hamwe n’ibindi bihugu bikomeye ku mugabane wa Buraya, inyuma y’igitero c’ibisasu bivugwa ko ari ivy’ubumara, muri Damas, haciye indwi irenga.
Ishirahamwe mpuzamakungu ONU ryarungitse abahinga bo kwihweza namba vy’ukuri ivyo birwanisho vyarakoreshejwe, ariko amatohoza ntarahera.
Mu bihugu bishigikiye Siriya harimwo Ubushinwa n’Uburusiya bivuga ko gufata ingingo iyo ariyo yose kuri Siriya bitegerezwa gukurikira itohoza ry’abahinga ba ONU.
Egide Nduwimana
