Uganda : Abasirikare ba Amerika bariko baratuza bimwe bikomeye abarwanyi ba LRA

Abasirikare ba Reta zunzubumwe z’Amerika bafashe umwe mubatanguje umuhari w’intagondwa za LRA, abarwanyi bo mu gihugu ca Ouganda.

Nk’uko bivugwa na Jennifer Psaki umuvugizi w’igisata kijejwe imigenderanire ya Amerika n’amakungu, (Dominic) Ongwen umwe mu barongozi akaba n’umwe mu batanguje umuhari wa LRA (l’Armée de résistance du Seigneur) yafatiwe mu gihugu ca Centrafrika n’abasirikare b’igihugu ca Reta zunzubumwe z’Amerika bariko baragerageza gutuza izo ntagondwa. Abo barwanyi ba LRA rero bakaba bagirizwa n’amashirahamwe mpuzamakungu aharanira agateka ka zina muntu, hamwe n’ibihugu vya rutura kuba wica ukuzako, ugafata abagore n’abakobwa ku nguvu, kwiba n’ayandi mabi ahungabanya agateka ka zina muntu.

Uwo muhari usanzwe wari ugisibije mu bihugu vya Repuburika iharanira intwaro rusangi ya Kongo, Centrafrika, Ubuganda na, Sudani y’Epfo, bikavugwa ko ubu ko watangiriwe ku mpande zose, ndetse bikavugwa ko utakigira isaganirizo kuva aho uduce twose wikekwamwo tumariye twugarijwe n’abasirikare ba Reta zunzubumwe z’Amrika n’abasirikare b’Ubumwe bw’Afrika.