Zimbabwe : Icegera c’umukuru w’igihugu n’abashikiranganji indwi bakombowe

Inyuma y’ibomborabombora ryabaye mu mugambwe uri ku butegetsi mu gihugu ca Zimbabwe, umukuru w’ico gihugu, Robert Mugabe yakomboye icegera ciwe, hamwe n’abashikiranganji bagera ku ndwi.

Ukutumvikana mu butegetsi bw’umugambwe utwara igihugu ca Zimbabwe kwakweze iyurukanwa rya Joice Mujuru, yahora ari icegera c’umukuru w’igihugu ca zimbabwe, Robert Mugabe, hamwe n’abashikiranganji indwi bo muri iyo Reta.

Imbere y’uko hafatwa iyo ngingo y’ukwirukana, Joice Mujuru yabanje kwagirizwa kurya igiturire, hamwe n’ugutegura kwica umukuru w’igihugu Robert Mugabe. Joice Mujuru akaba yagumye yamirira kure ivyo yagirizwa, ahubwo akavuga ko yiteguriye guhangana n’abashaka kumutera ubwoba. Akaba yaciye abanza gukurwa mu mabanga y’icegera c’umukuru w’umugambwe ZANU PF uri ku butegetsi.

N’aho ibinyamakuru vya Reta muri Uganda bivuga amakosa menshi yagirizwa Joice Majuru yahora ari icegera c’umukuru w’igihugu hari haheze imyaka cumi, hari ayandi makuru avuga ko yoba azira ko yashaka kuzoserukira umugambwe ZANU PF wa Robert Mugabe mu matora, ikibanza coba gisanzwe gikenewe kandi na Mugabe Robert nyene.