Uganda : Igihano gihasha ku bahuza ibitsina babisangiye

Inama nshingamateka y’igihugu ca Uganda yatoye itegeko ryiyamiriza abahuza ibitsina babisangiye, aho mbere bategekanya umunyororo wo guherayo mu kubahana. David Bahati, umunyamategeko umwe mu biyumviriye iryo tegeko avuga ko ahubwo ubwa mbere bari biyumviriye gushiraho igihano co gupfa.

Iryo tegeko rero rigiye kurungikirwa umukuru w’igihugu ca Uganda kugira nawe aryemeze. Integuro y’iryo tegeko ryo guhasha abahuza ibitsina babisangiye yari yatanguye mu mwaka wa 2009 ariko ica ibanza guhagarikwa kubera ko amakungu nka Reta zunzubumwe za Amerika bari bawiyamirije bavuga ko iyo nteguro y’itegeko iteye isoni.

Iyo nteguro y’itegeko ubwa mbere yavuga ko bazoshira igihano co gupfa kuri uwo wese yofatwa ubugira kabiri ariko arahuza ibitsina n’uwo babisangiye, hamwe kandi n’uwo wese azofatwa ariko agendana n’umwana atarakwiza imyaka 18 canke uwurwaye umugera wa Sida.

Mwomenya ko uguhuza ibitsina ku babisangiye vyari bisanzwe bibujijwe muri ico gihugu, ariko ubu ibihano bikaba bikaze kuko n’uwuzoteza imbere abo bahuza ibitsina azohanwa (promotion publique de l’homosexualité).