Kizza Besigye yasubiriwe gutabwa mu mvuto

Mu gihe igikorwa c’uguharura amajwi yavuye mu matora y’umukuru w’igihugu kibandanya muri Uganda, igiporisi casubiriye guta mu mvuto Kizza Besigye, umukuru w’umugambwe FDC utavuga rumwe n’umugambwe wa Kaguta Yoweri Museveni uri ku butegetsi muri ico gihugu.

Igiporisi ca Uganda cagize umukwabu ku cicaro gikuru c’umugambwe FDC mu gisagara ca Kampala, gifata Kizza Besigye, ahiganwa na Yoweri Museveni mu matora yabaye kuri uwu wa kane, akaba ariwe ari mu kibanza ca kabiri mu biharuro vy’agateganyo.

Igihe Kizza Besigye yatabwa muri yompi, yagira atange ikiganiro ku bamenyeshamakuru, akaba atabwiwe igituma ahagaritswe, n’aho ajanwe gupfungirwa.

Kuri uwu wa gatanu, ibaye incuro igira gatatu mu ndwi imwe gusa igiporisi gipfunga Kizza Besigye. Kuwa mbere, yari yafashwe yagirizwa gukora imyiyamamazo inyuranye n’amategeko.
Kuri uwu wa kane umunsi w’amatora, Kizza Besigye yatawe muri yompi ahorwa ko yagerageje kwinjira mu biro vy’itora vyavugwamwo ubusuma bw’amajwi.

Ku muhingamo wo kuri uwu wa gatanu, ahari ingoro y’umugambwe FDC wa Kizza Besigye hakaba hari abaporisi n’abasirikare benshi.

Ibiharuro vy’agateganyo vyerekana ko Yoweri Kaguta Museveni ari mu kibanza ca mbere, n’amajwi 62 kw’ijana, mu gihe Kizza Besigye atavuga rumwe nawe agira kabiri n’amajwi 33 kw’ijana.

Bitegekanijwe ko uwuzotsinda muri ayo matora azoba afise amajwi ari hejuru y’ibice 50 kw’ijana. Bitagenze uko naho, hazoca hategurwa amatora ku ncuro ya kabiri.