Umukenyezi wa Houphouët-Boigny yabuze ivyo yari yasigiwe n’umugabo wiwe

Inyuma y’imyaka hafi 22 umushingantahe wiwe yitavye Imana, umupfasoni wa Félix Houphouët-Boigny umukuru w’igihugu wa mbere wa Cote d’Ivoire avuga ko ubutunzi yari yiteze ataronse namba.

Félix Houphouët-Boigny akari muzima, yari yemeyere umugore wiwe wa kabiri Marie-Thérès Houphouët-Boigny ko atazigera asamira isazi kw’itama na rimwe hamwe yo uwo mutama yahoze arongoye igihugu ca Cote d’Ivoire yokwereka umukondo ijuru. Ku wa 7 Kigarama umwaka w’1993, amafaranga angana n’amanyaburaya imiriyoni 100 akaba ariyo yaharuwe nk’umutungo wa Houphouët-Boigny. Kuva ico gihe cose rero, umugore wiwe agira kabiri, akaba akiriko ariruka ayarondera. Amaze kwitura amasentare yo mu bihugu vy’Ubufaransa kugira atunganirizwe kuri ayo matungo yasizwe n’umugabo wiwe, ariko akaba hamwe asanga abana b’umugore wa mbere bayatwaye kera.

Marie Therese Houphouët-Boigny akavuga ko umugabo wiwe yari yamwemereye ibisigi vyiwe vyose, ndetse muri iyo myaka 22 yose amaze, Houphouët-Boigny yitavye Imana, akaba avuga ko ariko arondera urupapuro umugabo wiwe yamusigiyeko ibisigi. Avuga ko urwo rupapuro ruri ahantu, naho kugeza ubu atarahatora.

Aremeza ko Houphouët-Boigny yari yamusigiye akabahasha kameze neza, kuzuye inoti, ariko akaba yari yamubwiye ko azogapfundurura amaze kwitaba Imana. Uwo mugore wiwe akavuga ko kamwe muri zimwe muri izo noti zari mu mabanki yo mu gihugu ca Suisse hamwe no mu Bufaransa.

Marie Therese Houphouet Boigny