Accueil > Inkino > FOOTBALL > Umukinyi Gervinho yagiranye amasezerano na AS Rome
Umukinyi Gervinho yagiranye amasezerano na AS Rome
vendredi 9 Myandagaro 2013
Gervinho, umukinyi ava mu gihugu ca Côte d’Ivoire yarateye umukono ku munsi w’ejo ku masezerano amuhuza n’umurwi wo mu gihugu c’Ubutaliyano « AS Rome ». Amafaranga uwo mukinyi yaguzwe ntaramenyekana neza, co kimwe n’ikiringo ayo masezerano azomara.
Ku myaka 26, Gervinho ahambije muri uwo murwi ibindi bihangange nka Maicon wo muri Bresil, Morgan De Sanctis na Francesco Di Mariano (abataliyano), Tin Jedvaj wo muri Croitie, Mehdi Benatia wo muri Maroc.
AS Rome na Arsenal (umurwi Gervinho yahora akinamwo) barumvikanye kuri ayo masezerano n’aho batamenyesheje ikiguzi. Amakuru ava ku rubuga ngurukanabumenyi rwa Arsenal amenyesha ko banezerejwe n’ibikorwa vya Gervinho muri uwo murwi. Abarongozi bose n’abakunzi b’uwo murwi baramushimiye bongera bamwipfuriza kuroranirwa mu gihugu c’Ubutaliyano.
AS Rome ubaye umurwi wa gatandatu Gervinho akinyemwo inyuma ya ASEC Mimosas (Côte d’Ivoire), Beveren (Ububiligi), Le Mans FC, Lille (Ubufaransa) na Arsenal (Ubwongereza)
Egide Nduwimana
