Umukinyi Vincent Kompany yuguruye ubunywero

Umukinyi Vincent Kompany yaraye yuguruye inzu y’ibunywero aho abakunzi biwe n’abakunzi b’urukanywa bazohora bakwirikirana inkino zose bongera basoma.

Kizigenza w’umurwi nserukira gihugu w’Ububirigi akanaba kizigenza w’umurwi wa Manchester City yaraye yuguruye inzu y’ubunywero mu gisagara ca Anvers. Muri ubwo bunywero hazokwerekanwa n’amahiganwa y’umupira w’amaguru mu buryo buramvuye.

Kompany bivugwa ko yoba afise amamuko mu gihugu ca Republika iharanira intwaro rusangi ya Congo, mu kiganiro n’abamenyeshamakuru yavuzeko ari umunezero kuri we kubona ashoboye kugira ikintu cegeranya abantu.

Vincent Kompany ati:"imigambi mfise n’uko abantu bomara umwanya mwiza bari kumwe (en bonne compagnie), barye neza bongere basome urukanywa neza baraba n’inkino zihimbaye".

Ubwo bunywero yise"Good Kompany"buzonaberamwo n’ubutambiro aho ibihangange mukuvuza umuziki (DJ) bazoba ariho bari hamwe n’abaririmvyi b’urwaruka.