Umuyobozi wa ETS Kamenge yabogojwe mu mabanga

Umuyobozi w’ishure ry’imyuga rya ETS Kamenge ari kumwe n’umuyobozi w’ubuhunga kuri iryo shure, babogojwe mu mabanga yabo, bakaba bazira kunanirwa gushira ku murongo abo bajejwe kurera, n’akajagari kahamaze iminsi.

Abatari bake bakaba bari bamaze iminsi basaba ko uyo muyobozi Desire Manangirakamaro yokurwa mu mabanga yiwe, kuko ari mubatuma indyane ziguma zibonekeza kuri iryo shure, afashanije n’akarwi k’abanyeshure harimwo uwitwa Komiseri bivugrwa ko, ari umukuru w’imbonerakure za CNDD FDD kuri iryo shure rya ETS.

Ikurwa ry’uyo muyobozi rikaba rishitse mu gihe abanyeshure bwaca bagaruka kwiga, inyuma yaho birukaniwe kuri uyu 1 Ruhuhuma uyu mwaka ku muhingamo. Ikurwa ry’uyo muyobozi rero bikavurwa ko rishobora gutuma hagaruka agahengwe, n’icuka ciza, hagati y’abarezi n’abanyeshure, na rirya ari no mubatumye ukuri kw’ihabwa ishano ry’umunyeshure kutamenyekana, kuko yoba yaguma ayovya amatohoza, mu gushinga imirwi irimwo abayoboke biwe gusa.

Ikurwa rya Desire Manangirakamaro ryemezwa nu bushikiranganji bw’amashure matomato n’ayisumbuye, nk’uko bivurwa na Juma Edouard umuvugizi w’ubwo bushikiranganji.