Ubuhindi : Umwana yavukanye imitwe ibiri

Mu gihugu c’Ubuhindi havutse umwana w’umukobwa afise imitwe ibiri, amazosi abiri n’igiti c’umugongo kirimwo bibiri.

Kw’igenekerezo rya 12 Ntwarante 2014, mu bitaro biri mu burengero bw’igihugu c’Ubuhindi vyitwa Cygnus biri ahitwa Sopinat, umugore yitwa Urmila Sharma w’imyaka 28 yavyaye abana babiri b’abakobwa bamatanye (deux sœurs siamoises).

Muganga Shikha Malik avuga ko uwo mugore yaje gupimisha imbanyi, arabonako afise abana bafatanye ariko ntaco yashobora gukora kuko iyo mbanyi yari igeze mu mezi menshi.

Ku kinyamakuru Daily Mail, muganga Shikha Malik asanzwe akwirikira ivy’imbanyi, avuga ko ivyo vyose vyatumwe n’ubukene bwokora amakara bugata buri mu muryango wa Urmila Sharma n’umugabo wiwe Subhash w’imyaka 32 kuko bananiwe no kuja gupimisha imbanyi kwa muganga, ikiri ntoyi. Uwo muganga avuga ko iyo ndwara yitwa "parapagus bicéphale" bisigura "umubiri umwe imitwe ibiri". Iyo rero abibona kare, uwo yibungenze yari guhitamwo ko iyo nda bayikorora canke akemera kuyivyara ariko azi neza ico izovamwo.

Kubera vyamaze kuba uko, umurwi w’abahinga mu buvuzi urimwo na muganga Shikha Malik, bavuga ko bazokora ibishoboka vyose kugira bakize amagara y’uwo mwana yamaze kuvuka afise imitwe ibiri.

Raba aha munsi uko uwo mwana ameze