Urukino rw’intamba na Botswana rurindiranwe igishika : Abakinyi 18 batowe

Hasigaye amasaha make umurwi nserukiragihugu w’Uburundi Intamba mu rugamba ugatana mu mitwe n’igihugu ca Botswana. Abakinyi batumweko n’aho batashoboye gushika bose, abahari barizeye intsinzi muri urwo rukino rutangura isaha icenda n’iminota mirongo itatu ku kibuga citiriwe umuganwa Rudoviko Rwagasore.

Abakinyi bose bari batumweko bifashe neza, n’imyimenyerezo baragize iyikwiye. N’aho ibihangange bibiri, Saido Ntibazonkiza atahawe uruhusha n’umurwi wiwe wa Cracovia, hamwe na Papy Faty arwaye ukuguru, bompi bakaba batazoba bari muri urwo rukino, abamenyereza umurwi nserukiragihugu Intamba mu rugamba bamenyesha ko abakinyi bahari babizeye, kandi n’intsinzi bayibona. Urwo rukino rutangura isaha icenda n’iminota mirongo itatu ku masaha y’i Bujumbura, kwinjira akaba ari amafaranga y’amarundi ibihumbi mirongo itanu (50000 Frs Bu) mu bwugamo bw’iteka, ibihumbi mirongo ibiri (20000 Frs Bu) mu bwugamo B na C, hamwe n’ibihumbi indwi (7000 Frs Bu) mu bwugamo A na D. Ku nkikuro z’ikibuga (pourtour) ni amafaranga ibihumbi bitatu (3000 Frs Bu).

Urutonde rw’abakinyi 18 batowe n’abamenyereza batanu kugira bahave baserukira Uburundi muri urwo rukino :

BIHA Omar (Vital’O FC)

ARAKAZA Mc Arthur (Flambeau de l’Est)

HARERIMANA Rashid Leon (LLB-Academic)

NIZIGIYIMANA Karim Mackenze (Rayon Sport)

NSABIYUMVA Frederick (Jomo Cosmos)

HABARUGIRA David (Rwdm Brussels)

NAHAYO Valery (La Gantoise FC Belgique)

NDIKUMANA Yussuf Lule (LLB-academic)

NDUWARUGIRA Christope Lucio (Chibuto FC Mozambique)

KWIZERA Pierre (Afad Djekanou, Cote d’Ivoire)

NZIGAMASABO Steve (Vital’O FC)

KAVUMBAGU Didier (Azam FC Tanzanie)

TAMBWE Amissi (Simba Tanzanie)

Abdulrazzak Fiston (Sofapaka Kenya)

NDAYISENGA Fouad (Rayon Sport)

NDIKUMANA Yamin Selemani (KF Tirana Albanie)

CEDRIC Amissi (Rayon Sport)

Armel DRAGAU (FC Outre Mont)