Vatikano: Haravugwa igiturire n’abashigikiye abahuza ibitsina babisangiye

Bivugwa ko Papa Francois yoba yashikirije ko mu bategetsi ba Vaticano harimwo umurwi w’abantu barya ibiturire kandi bashigikiye abahuza ibitsina babisangiye.

Bivugwa ko yoba yavuze ayo majambo y’inkoramutima mu mubonano n’umugwi w’abihebeye Imana bo muri Amerika y’epfo.

Banditse icegeranyo c’ivyo bayaze ubu rero gisa n’icanyerejwe kigashika mu minwe y’urubuga rwa internet rwo muri Chili rwaciye rugisohora.
Ku bw’urwo rwandiko , Papa yavuze atarya umunwa na gato igihe yariko aravuga ibibazo biri muri Vaticano.

Bivugwa ko yabwiye abari bamugendeye ko hari abantu bameze neza kandi beranda mu bakora I Vaticano, ariko ko hari n’abandi barya ibiturire.
Binavugwa ko yavuze kandi ko aho muri Vaticano nyene hari abashigikiye abahuza ibitsina babisangiye.

Mu kwezi kwa kabiri ibinyamakuru vyo mu Butaliano vyari vyanditse bivuga ko abihebeye Imana bahuza ibitsina n’abo basangiye ibitsina bakorera hamwe kugirango inyungu zabo zironke ikibanza mu ntwaro ya Vaticano, kandi ko bamwe bagira ibibazo vy’ababatyoza.

Abategetsi ba Vaticano bakaba bahakanye ivyo bivugwa yivuye inyuma.