Zimbabwe: Abakozi amajana atatu b’iradiyo n’imboneshakure bagiye kwirukanwa ku kazi

Iradiyo n’imboneshakure vy’igihugu ca Zimbabwe bimenyesha ko abakozi bashika amajana atatu bagiye kwirukanwa mu kazi.Ivyo vyashikirijwe kuwa gatanu igenekerezo rya 14 Myandagaro 2015.

Iradiyo n’imboneshakure vy’igihugu vyafashe iyo ngingo inyuma yaho bibonekeyeke ko bashobora kunanirwa guhemba abakozi.Reta ivuga ko abakozi ba Reta bahembwa amafaranga menshi kandi ubutunzi bw’igihugu butifashe neza.

Ubukene bw’igihugu ca Zimbabwe ntibwafashe Reta gusa,kuko n’ishirahamwe ryo gutumatumanako amakuru Econet rikorera mu gihugu ca Zimbabwe ryaramaze kumenyesha ko rigiye kwirukana abakozi baryo.

Ibintu vyunyutse mu gihugu ca Zimbabwe,inyuma y’itorwa ry’umukuru w’igihugu Robert Mugabe mu mwaka w’2013 kandi hari abavyiyamiriza,amakungu aca ahagarika infashanyo.