Ibitenge 1322 vy’abakora urudandaza rwa magendu vyafashwe

Yanditswe na Vianney BIKORIMANA
Kuya 7 Myandagaro 2017 saa 04:52
Yasomwe : 8001
0 0

Ibidandazwa vya magendu bigizwe n’ibitenge 1322 vyari mu mifuko 26, igikarato c’inzoga zitwa serare hamwe n’igikarato c’inzoga zitwa drosti nivyo vyafashwe n’igiporisi mu bucagucagu bwo kuri uwu wa mbere igenekerezo rya 7 Myandagaro 2017 ku nkengera z’ikiyaga Tanganyika, hafi y’ubunywero buri mu Kinindo ahitwa kwa Ntembagare.

Umuvugizi w’igiporisi Petero NKURIKIYE amenyesha ko ivyo bidandazwa vyafatiwe mu bwato 2 abari babizanye babonye abajejwe umutekano baca bakorokera mu mazi, n’ubu igiporisi kiracabarondera.

Petero NKURIKIYE avuga ko kuva hatanguye isekeza ryo gutuza abantu bakora urudandazwa rwa magendu, na cane cane ku ruhande rwa Gatumba aho Uburundi buhana urubibe n’igihugu ca Reta iharanira intwaro rusangi ya Kongo, abakora urwo rudandazwa baciye bahindura inzira ubu bakaba baca mu mazi ya Tanganyika.

Petero NKURIKIYE yavuze ati : « Biraboneka ko inzira z’abiba zabaye nyinshi kuva igiporisi gitanguye isekeza mu Gatumba aho twafata n’imiburiburi ibitenge 50 ku munsi, abo bakora urudandazwa rwa magendu baciye bahindura inzira ubu bakaba baca mu mazi yo mu kiyaga Tanganyika kuko babonye ko baciye mu Gatumba baca bafatwa. »

Umuvugizi w’igiporisi avuga kandi ko abo bakora urudandazwa rwa magendu batuma Reta ihahombera, kuko ata kori batangira, bigatuma kandi n’abadandaza biciye mu mategeko baca bahomba kuko usanga bariko badandariza ku giciro kimwe n’abo badandaza batatannze ikori.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha