Ihinguriro BRARUDI rigiye gutangura kudandaza ubundi bwoko bwa Primus

Iyo nzoga ikozwe mu bisanzwe bikorwamwo inzoga ya PRIMUS ariko bakongeramwo indimu,bituma igira akamoto k’indimu.

David RUVARI ajejwe ikinyobwa Primus mw’ihinguriro BRARUDI,yabwiye abamenyeshamakuru ko,mu cigwa cakozwe basanze hari abanwa ikinyobwa Primus bakagishiramwo ifanta ya Citron kugira bagerageze kworosha ubukazi bwa PRIMUS, ko rero ari muri iyo ntumbero ihinguriro BRARUDI ryahisemwo gukora PRIMUS yikwije isanzwe irimwo indimu.

David RUVARI yavuze kandi ko, mu gihe Primus yari ihasanzwe ifise ubukari bw’umwambiro bungana na 4,5 kw’ijana(4,5%),Primus Citron yoyo ifise ubukari bw’umwambiro kuri 4 kw’ijana (4%).

Inzoga primus citron izogurishwa amafaranga 1000 y’amarundi, iri mw’icupa rya Primus ritoya (Akabajou),bigatandukanira ku gicapo kiri inyuma kw’icupa,kuko kw’icupa rya Primus citron hariko ibicapu bisa n’urwatsi rutoto.

Inzoga primus citron izotangura kudandazwa mu minsi ya vuba, kandi izodandazwa mu gihugu cose.