OLUCOME yizeye ko ingingo z’ukurwanya igiturire mu Burundi zizofatwa mu nama yimirije

Yanditswe na Vianney BIKORIMANA
Kuya 3 Munyonyo 2017 saa 05:26
Yasomwe : 2259
0 0

Ishirahamwe ryiyemeje kugwanya igiturire n’ugusesagura itunga rya Reta, OLUCOME risaba inama mpuzamakungu ihuza ibihugu vyateye umukono ku masezerano yo kugwanya igiturire, ko yotora ingingo izotuma Uburundi buzogwanya igiturire, na cane cane kunyuruza imitahe. OLUCOME ibishikirije mu gihe igenekerezo rya 6 gushika igenekerezo rya 10 Munyonyo 2017 hazoba inama ihuza ivyo bihugu vyemeje ayo masezerano.

Mw’itangazo OLUCOME yasohoye kuri uwu wa gatanu, Gabriel RUFYIRI arongoye iryo shirahamwe amenyesha ko bibabaje kubona igihugu c’Uburundi kitashize mu ngiro ivyo casabwe mu cegeranyo ca mbere co kuva mu 2011 gushika 2015 kandi abahinga ba ONU bakurikiranira hafi ibijanye no kurwanya igiturire buca bagira ikindi cegeranyo ca kabiri.

OLUCOME imenyesha ko Reta y’Uburundi yari ifise amahirwe yose yo gushira mu ngiro ivyo yasavye mu cegeranyo ca mbere, kuko imigambi yerekeye gushira mu ngiro amasezerano y’i Arusha hamwe no kugwanya igiturire, yose yari yahawe imfashanyo kugira ije mu ngiro.

Muri OLUCOME bashikiriza kandi ko ivyashizweho vyose kugira hagwanywe igiturire yaba inzego z’ubutungane, amashirahamwe hamwe n’inzego zigwanya ico giturire ko vyose ari ibikanganyoni, kuko igiturire kitigeze kigabanuka mu gihugu.

JPEG - 379.5 ko
Gabriel RUFYIRI, umukuru w’ishirahamwe OLUCOME

OLUCOME iheraheza isaba ko hotorwa ingingo izotuma igihugu gishobora kugwanya igiturire kuko ivyaha bijanye no kunyuruza amatunga hamwe n’imitahe gushika ubu bitarahanwa mu gihugu.

Tubibutse ko inama mpuzamangu ihuza ibihugu vyateye umukono ku masezerano yo kugwanya igiturire izotangura kuri uwu wa mbere igenekerezo rya 6 gushika igenekerezo rya 10 Munyonyo 2017 ku mugwa mukuru Vienne mu gihugu ca Autriche.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha