Abacamanza basabwe gutebutsa imanza n’ukwisunga akarangamutima

Mu ngoro y’amakoraniro mu Kigobe, ku munsi w’ejo kuwa kabiri, umukuru w’igihugu Petero Nkurunziza yaratanguje umwaka mushasha w’ubutungane 2013-2014. Petero Nkurunziza yasavye abacamanza gutebutsa imanza, kandi zizewe.

Umukuru w’igihugu Petero Nkurunziza yamenyesheje ko kugira ubutegetsi bugende neza, bugezurwe kandi busuzumwe, hari hakenewe ubuhinga bufatiye ku biharuro bwerekana ibimaze gukorwa n’ibiteguwe gukorwa.

Petero Nkurunziza yibukije ko imanza ziciwe ntizishirwe mu ngiro ata gaciro ziba zifise, kandi ari nazo zirwiza amatati, zigatuma n’abanyagihugu batakariza icizere inzego z’ubutungane. Yahamagariye abacamanza kwubahiriza amategeko n’akarangamutima kagenga umwuga wabo.

Umushikiranganji w’ubutungane, Pascal Barandagiye yamenyesheje ko imanza 9000 arizo zashizwe mu ngiro mu minsi ijana, mu mugambi IRR ( Initiatives à Résultats Rapides) wo gutebutsa imanza.

Uwo mwaka mushasha w’ubutungane wuguruwe inyuma y’ukwezi kumwe gusa habaye inama rukokoma y’ubutungane. Muri iyo nama hakaba haratanzwe ivyiyumviro n’ivyokorwa mu ntumbero yo gutorera inyishu ibibazo biri muri ico gisata.