Bubanza : Musitanteri wa komine Musigati yatanze imihoho

Niragira Isaie yahora ari musitanteri wa komine Musigati yatanze imihoho, ubu iyo komine igaca iba iraramutswa umuhanuzi ajejwe intwaro n’imibano muri komine Musigati.

Mu ntara ya Bubanza, komine Musigati itwarwa vy’agateganyo n’umuhanuzi wa musitanteri ajejwe intwaro n’imibano. Aho ni inyuma y’itanga ry’imihoho rya Niragira Isaie yahora ari musitanteri wa komine Musigati. Uwo yatanze imihoho yamenyesheje ko ari ku mvo atashimye gushira ahabona, bamwe bakiyumvira ko hoba hari ukutumvikana hagati yiwe n’inama mpanuzwajambo ya komine, abandi nabo bakabona ko woba ari umukenyuro wo kwitegurira amatora yimirije.

Buramatari w’intara ya Bubanza, Nyandwi Anselme amenyesha ko ugutanga imihoho ari uburenganzira bw’umukozi wese, iyo abona agira aje ahari akarusho kurusha, canke agiye gukora ivyiwe. N’aho avuga ko ugutanga imihoho ari uburenganzira, Anselme Nyandwi aremeza ko ibikorwa vya komine Musigati bizokwikwega, kuko uwo azomusubirira vy’agateganyo hari ivyo atazoba arekuriwe gukora. Anselme Nyandwi akizera ko inama mpanuzwajambo ya komine izokwihutira gusubiriza uwo musitanteri.

Anselme Nyandwi, buramatari w’intara ya Bubanza