Kirundo : Umukuru w’umugambwe SAHWANYA FRODEBU NYAKURI yumvirijwe mu giporisi

Faustin Kubwayo, umukuru w’umugambwe SAHWANYA FRODEBU NYAKURI mu ntara ya Kirundo yumvirijwe n’inyamiramabi yo muri iyo ntara kuri uwu wa gatanu. Uwo munyeporitike yagirizwa uguhungabanya umutekano w’igihugu.

Faustin Kubwayo asanzwe arongoye SAHWANYA FRODEBU NYAKURI ishami riyoboka Jean MINANI umukuru wa CNARED (Conseil National pour le Respect des Accords d’Arusha pour la paix et la Réconciliation au Burundi et de l’Etat de Droit) aheruka gukurwa mu burongozi bw’uwo mugambwe, agasubirizwa na Keffa NIBIZI.

Faustin Kubwayo, umukuru w’umugambwe SAHWANYA FRODEBU NYAKURI mu ntara ya Kirundo

Umuryango wa Faustin Kubwayo ari mu munyororo umenyesha ko uwo mukuru w’umugambwe ahorwa ko yagumye ku ruhande rwa Jean MINANI arongoye CNARED, akaba mbere yaranse gukorana n’umugambwe uri ku butegetsi.

Umugambwe SAHWANYA FRODEBU NYAKURI uheruka kwigabura mu mashami abiri, rimwe ryegereye ubutegetsi rirongowe na Keffa NIBIZI, hamwe n’irindi rirongowe na Jean MINANI, rikaba riri mu runani CNARED ruhurikiyemwo abatavuga rumwe n’ubutegetsi bw’umukuru w’igihugu Petero NKURUNZIZA.