Accueil > Ubutunzi > Ikigega FIDA congereje imfashanyo gushika ku miliyoni zirenga (...)
Ikigega FIDA congereje imfashanyo gushika ku miliyoni zirenga 300
dimanche 25 Munyonyo 2012
Ikigega mpuzamakungu giteza imbere uburimvyi FIDA kimenyesha ko kizokongereza imfashanyo cahora giha u Burundi kuva ku milioni 150 y’amadolari gushika ku milioni 300 mu mwaka uza w’2013. Iyo mfashanyo izoja ahanini mu guteza imbere urwaruka rwo mu gihugu hagati.
Amakuru dukesha ikimenyeshamakuru Afriquinfos avuga ko uwuserukira ikigega FIDA mushasha mu Burundi M.Haidara yabimenyesheje ku munsi wa kane italike 22 z’uku kwezi ahejeje kugirana umubonano n’icegera ca mbere c’umukuru w’igihugu Therence Sinunguruza.
Yavuze ko umubonano ahanini wahagaze ku kuvugana n’icegera ca mbere c’umukuru w’igihuguivyerekeye guteza imbere igisata c’uburimyi ,guca hirya no hino aho FIDA yofasha kugira abanyagihugu bave mu bukene barimwo. Yavuze ko imfashanyo izokongerekana kuva ku mafaranga imilioni 150 y’anmadolari igashika ku milioni 300 ku mwaka uza w’2013.
Yongeye ko ati ‘’Ikigega FIDA nico catowe kugira cegeranye imfashanyo zose zerekeye umugambi wo guteza imbere uburimyi mu Burundi kuva mu mwaka w’2012 gushika mu mwaka w’2017’’.
Ikigega FIDA gisanzwe gifasha mu Burundi imigambi itari mikeya ikomeye harimwo uwo gusubiramwo kunagura igisata c’ubworozi, uwoguteza imbere uburimyi hamwe n’uwo kunagura uburimyi n’ubworozi birikumwe. Uretse ivyo, uwuserukira FIDA mu Burundi azokwemeza umugambi wo gufasha urwaruka rwo hagati mu gihugu mu kwezi kwa Kigarama uyu mwaka.
Pierre Claver Niyonkuru
