Aba JRR bateye ivyatsi ivyashikirijwe na Arnaud Irakoze

Urwaruka mparaniramajambere rwa Rwagasore JRR rumenyesha ko buca rwisunga ingingo ya 11 y’amategeko ngenderwako y’umugambwe UPRONA, kugira bashigikire imboneza zabo mu bikorwa vya komite nkuru y’umugambwe.

Umushingwamanza Patrick Nitegeka arongoye JRR

Mu kiganiro yahaye ikinyamakuru IGIHE, umushingwamanza Patrick Nitegeka arongoye umuhari w’urwaruka rwa UPRONA arirwo JRR, akavuga ko biteguye gushigikira abari mu rwego rukuru rw’umugambwe buca rukorana kuri uyu wa 13 Mukakaro uyu mwaka. Avuga ko iyo nama ikurikije amategeko, ari naco gituma batarota bareka gushigikira izo mboneza zabo, kugira ingorane z’abiha uburongozi bw’umugambwe wabo, canke babuhawe bidakurikije amategeko zihave.

Ivyo, umushingwamanza Patrick Nitegeka akabivuga ariko abeshuza ivyashikirijwe na Arnaud Irakoze, umu JRR bivugwa ko ashigikiye Concilie Nibigira n’abo bari kumwe. Mu kiganiro Arnaud Irakoze yari yahaye abanditsi n’abamenyeshamakuru kuri uyu wa gatanu igenekerezo rya 11 Mukakaro, akaba yasaba aba JRR kutaja muri ivyo bikorwa vfyatumweko kuri uyu wa 13, kugira ntibagire ingorane nk’izashikiye urundi rwaruka rwa MSD ku wa 8 Ntwarante.

Arnau Irakoze, umu JRR ashigikiye UPRONA ishami rya Concilie Nibigira

Kuri ivyo basabwa na Arnaud Irakoze, Patrick Nitegeka arongoye JRR akavuga ko vyerekana uguta inguvu k’umurwi uboheye amaboko i mugongo umugambwe wa Rwagasore. Avuga ko umunsi w’uwa 8 Ntwarantewabaye umunsi mubi mu mugambwe UPRONA na MSD, mu gihe abakenyezi ba UFB baterwa ivyuka bikoroza amosozi n’igiporisi,nayo urwaruka rwa MSD rukaraswa. Amenyesha ko Arnaud Irakoze ata rwego na rumwe rwa JRR arimwo, ndetse no muri komine ya Kinindo yari yitowemwo yatsinzwe nk’uko uyo mushingwamanza arongoye JRR abandanya abivuga. Amenyesha ko inzego za JRR ziriho, kandi zatowe izuba riva, nazo zigakora bikurikije amategeko, atabudumbidumbi.

Umushingwamanza Patrick Nitegeka akarangiza amenyesha ko, amanama yo gutegura umunsi w’ejo ku wa 13 Mukakaro, abandanya mu gihugu cose n’i Bujumbura, akavuga ko buca basidukana n’iyonka kugira bakure intambamyi zose mu nzira, zimaze iminsi zugarije umugambwe wabo.