Abakenyezi bo muri Frodebu barababajwe n’ibikorerwa abakenyezi badandaza ivyamwa

Abakenyezi bo mu mugambwe Sahwanya Frodebu barasohoye itangazo biyamiriza ikubagurwa rimaze iminsi rigirwa abakenyezi badandariza ivyamwa n’imboga mu mabarabara y’igisagara ca Bujumbura.

Muri iryo tangazo ryasohotse kuri uyu wa gatanu igenekerezo rya 20 Kigarama, abo bakenyezi bo mu mugambwe Sahwanya Frodebu basohoye itangazo aho biyamiriza ikubagurwa rimaze iminsi rigirirwa abakenyezi badandariza ivyamwa n’imboga mu mabarabara yo mu gisagara ca Bujumbura. Kuva isoko ihiye igatokombera haribonekeje urudandazwa rwo mw’ibarabara na cane cane urwo ivyamwa n’imboga. Guhera mu ntango z’iyi ndwi, abo badandaza nta gahengwe bigeze baronka kuko igipolisi caguma kiboma inyuma, kizana imiduga kiburiza. Mbere hari umukenyezi yahatswe kuhasiga ubuzima mu gihe yatembagajwe n’umupolisi. Aba polisi bo bavuga ko, iyo ngingo ariya musitanteri wa komine Rohero, abasaba kwirukana abo badandaza ku mvo y’umutekano hamwe n’isuku.

Abatari bake bariyamirije iryo yirukanwa ry’abo badandaza, umupfasoni Epiphanie Bigabo arongoye urunani rw’abakenyezi baharanira demokarasi ishingiye ku gusabikanya (OFESODE) avuga ko abo bakenyezi babajwe n’ibimaze iminsi bishikira abo badandaza b’ivyamwa. Avuga ati :’’ Abo bakenyezi barinze kugurana umutahe kugira basubire kudandaza, none raba n’utwo bihangayikiye bakaronka igipolisi kica kidutwara.

Urwo runani rusaba Reta ko yoreka kubaturatuza mu gihe itarabaronsa ahandi bakorera, kanatsinda ngo nta mudandaza adandariza ahatariho abaguzi. Asaba Reta kandi kubuza igipolisi gukoresha igikenye. Uwo mupfasoni asaba kandi Reta gushumbusha abatwawe utudandazwa twabo, kuko abenshi ni bantahonikora hamwe n’impfuvyi zitunze batoya babo, bigatuma rero baguma binjira mu bukene. Arangiza asaba abo badandaza gufatana mu nda muri bino bihe bitoroshe barimwo.