Abanyeporitike basaba udutoroshi "Torche à lumière ultraviolet" mu matora

Mu banyeporitike bamwe bamwe no mu murwi CENI ntibabona kumwe icerekeye gukoresha twa dudotoroshi dushobora gutuma babona umuntu ko yari yatoye bamumuritse aho basize irangi, utwo bita mu rurimi rw’igifaransa "Torche à lumiere ultraviolet".

Yaba abanyamigambwe, bamwe bazitoza ku giti cabo hamwe n’umurwi CENI barahuriza hamwe ko utwo dutoroshi twari dukenewe ariko rero umwe wese aratanga insiguro ziwe. Rwasa avuga ko utwo dukoresho twari dukenewe kugira bize bishoboke ko amakosa yibonekeje mw’iyandikwa rya mbere na cane cane abiyandikishije kenshi incuro irenga imwe ntibashobora gutora akarenga rimwe.

Mu murwi CENI bariko bashira mu nyabwonko abiyandikishije

Mu mugambwe CNDD-FDD naho babona ko ivyo bintu biramutse bibaye vyohava bituma ikiringo categekanijwe ku matora kitubahirizwa. Umukuru w’umurwi CENI nawe atanga insiguro ko abanyamigambwe hamwe n’izindi mpande ziraba amatora yaba abafasha batigeze bumvikana kuri ico kibazo. Kubwa Petero Karaveri Ndayicariye, umwanya wagenewe amatora hamwe n’uburyo bukenewe biri mu ntambamyi zituma utwo dukoresho tudashobora gukoreshwa mu matora abarundi bimirije muri uwu mwaka w’2015.

Kubw’umunyamabanga mukuru w’umugambwe SAHWANYA FRODEBU Euphrasie Bigirimana nawe, atagikozwe bizogorana gukosora amakosa yagiye yibonekeza mw’iyandikwa na cane cane abiyandikishije incuro nyinshi.

Abo banyeporitike bagira bati muvyo twabonye bishobora gukosorwa harimwo amakosa afatiye kw’izina, kuri karangamuntu, amazina y’abavyeyi asa, ariko gushika ubu bavuga ko hari hakenewe ko hoboneka ikintu kiza gikosora amakosa ku cerekeye abiyandikishije incuro nyinshi. Ayo makenga bakaba bayashikirije ku munsi wa gatanu igihe bari baramutse bishikira kuraba aho ibikorwa vyo gushira mu nyabwonko abiyandikishije kigeze. Ico gikorwa kikaba kiriko kibera kw’ibarabara rya Gatumba mu nyubakwa za ’’CECORES’’.