"Abashaka kwitoza ni ngombwa bategekanye inyishu ku bijanye n’amafaranga Reta ikoresha"

Mw’ ishirahamwe PARCEM (Parole et Actions pour le Réveil des Consciences et l’Evolution des Mentalités bavuga ko hakiri ingorane ku bijanye n’itunganywa ry’amafaranga Reta ikoresha ku mwaka, nk’uko bivugwa na Faustin Ndikumana asanzwe arirongoye.

Faustin Ndikumana arongoye ishirahamwe PARCEM

Muri kino gihe twimirije amatora abarundi cane cane abategekanya kwitoza ni ngombwa ko baba bategekanije inyishu kuri izo ngorane zijanye n’amafaranga Reta ikoresha ku mwaka, ivyo umukuru wa PARCEM akaba yabishikirije mu kiganiro categuwe n’iryo shirahamwe kuri uno wa kane cerekeye intambamyi zijanye n’amafaranga Reta izokoresha mu mwaka w’2015.

Abarundi n’abashaka kwitoza avuga ko bategerezwa kumenya ko hari ingorane mu mafaranga Reta ikoresha. Haracari ingorane y’imfashanyo zikenewe cane mu Burundi kugira Reta ishobore kubaho kuko amafaranga Reta itoza adakwira mu kubaho kwa minsi yose, ikindi n’uko amafaranga yokwibeshaho kwa Reta yobwirizwa kugabanuka, nk’uko Faustin Ndikumana abandanya abishikiriza.

Ikindi asaba agira ati :’’naho ayo mafaranga ataboneka biraboneka ko atagukorera ku mugaragaro, hari ingendo y’uko amahera atozwa mu banyagihugu adatwarwa ku makonti azwi n’amategeko, Ku bwa Faustin Ndikumana rero, mu gihe ivyo bibazo vyose bizoba bitaratorerwa umuti, hazokwama agahaze mu butunzi bw’igihugu.