Akamo k’abakoresha amabarabara ya Amitié na Mission kumviwe

Umugambi w’ishirahamwe ry’ababirigi CTB (Coopération Technique Belge), ubifashijwemwo n’ishami rya ONU ryitaho iterambere PNUD, waratanguje kuva kw’igenekerezo rya 2 Ruhuhuma 2015 ibikorwa vy’ugusanura amabarabara "Avenue de la mission" hamwe na "Avenue de l’amitié."

Ivyo bikorwa vy’ugusanura amabarabara ya Amitié na Mission ku buhinga bw’amabuye ashashe (Pavage) bizomara amezi ane. Imetero 250 kw’ibarabara avenue de la mission akaba arizo zizokorwa, mu gihe kuri avenue de l’Amitié hazokorwa imetero 330, hamwe n’imetero 20 z’amahwane ya Avenue bitirira iya ONU. Kuri ayo mabarabara abiri ya Amitié na Mission, ibikorwa bizotangurira kw’ibarabara bitirira irya UPRONA (Boulevard de l’UPRONA), bisozererwe kw’ibarabara ryitiriwe umuganwa Rudoviko Rwagasore (Chaussé du Prince Louis Rwagasore).

Gérard Nyandwi, umunyamabanga ntayegayezwa mu bushikiranganji bw’intwaro yo hagati mu gihugu, ari nabwo bushikiranganji bwasavye kandi busanzwe bukurikirana ivyo bikorwa, amenyesha, mu kiganiro n’abamenyeshamakuru cabaye kuri uwu wa kabiri, ko ikibazo co kubungabunga ayo mabarabara arico kizoba gisigaye, akemeza ko bazotunganya ingene ayo mabarabara yobungabungwa kurusha uko vyahora, bisunze ubwigenge amakomine agiye kuronka, niyamara kuva kuri 13 akaja kuri atatu.

Leonard Ntandikiye, umunyamabanga ntayegayezwa mu bushikiranganji bw’intwaro yo hagati mu gihugu (uwa kabiri uhereye i bubamfu)

Olivier Chanoine wo mu mugambi CTB yasavye abanyagihugu hamwe n’uburongozi bw’igisagara ca Bujumbura (Mairie) kuzobungabunga ayo mabarabara azotwara amafaranga y’amadorare agera ku 838780 (hafi umuriyaridi umwe n’igice mu mafaranga y’amarundi). Muvyokorwa, Olivier Charmoine akavuga nk’ugusibura imiserege ntizibe hamwe n’ugutunganya ingene imicafu yoza iregeranirizwa hamwe, ayo mabarabara agumane isuku, kandi abungabungwe nk’uko bitegerezwa.