Accueil > Ubutunzi > Amafaranga 8 400 000 niyo abakozi ba OBR baronkeje ishirahamwe "Uburundi (...)
Amafaranga 8 400 000 niyo abakozi ba OBR baronkeje ishirahamwe "Uburundi bwacu"
dimanche 24 Munyonyo 2013
Abakozi ba OBR baronkeje imfashanyo ishirahamwe "Uburundi bwacu" rifasha abahuye n’ivyago. Iyo mfashanyo ikaba ingana n’amafaranga 8 400 000. Ayo mafaranga akazofasha abakenyezi b’abadandaza baburiye ivyabo mw’isoko nkuru ya Bujumbura.
![](local/cache-vignettes/L448xH336/obr7-78069.jpg?1519654263)
Kuri uyu wa 22 Munyonyo Ikigo OBR (Office burundais des recettes ) carahaye ishirahamwe’’ Uburundi bwacu’’ imfashanyo igera ku miriyoni 8.400.000 y’amarundi ayo nayo akazofasha abakenyezi b’abadandaza bato bato baburiye ivyabo mw’isoko nkuru ya Bujumbura, ayo mafranga akaba yavuye mu bakozi b’ikigo OBR.
Ku bw’umunyamabanga nshingwabikorwa w’iryo shirahamwe’’ Uburundi bwacu’’,Niyonzima Melchiade, ayo mafranga mu gufasha abo badandaza baca bayacisha mu mashirahamwe atanga ingurane CECM, WISE, hamwe na kazoza finance. Ayo mashirahamwe bakaba bari bagiriraniye amasezerano n’iryo shirahamwe Uburundi bwacu kugira basubire bahe ingurane abakenyezi Ib’abadandaza bato bato baburiye ivyabo mw’isoko, nabo basubire kuvyura urudandazwa rwabo.
Ukwo ayo mafranga akora rero, buri mudandaza aronka ideni ry’amafranga 100,000 asubiza ata nyungu akayariha mu mezi ane gushika kuri munani. Abo bakenyezi baba baregeranijwe mu mirwi y’abantu batanu canke barenga, ugasanga buri murwi uronse amafranga angana 1,000,000. Holmes Kieran arongoye ikigo OBR mw’ijambo ryiwe, yamenyesheje ko OBR itari gushobora kwirengagiza izo mbabare kuko ico kigo kiri mu vyari bisanzwe bikorana n’abo badandaza.Yarangiza ashimira abakozi b’ikigo OBR bemeye kugira ico batanze.
Mwomenya ko imirwi 97 ari yo imaze kuronswa ingurane n’ayo mashirahamwe yo kuguranana abagera ku 612 akaba aribo bamazen kuronka amadeni yose hamwe akaba agera ku mafranga 55.940.000 y’amarundi.
KARIRE Floxella