Amashirahamwe adaharanira ivyicaro vya politike yandikiye Edouard Nduwimana

Mu rwandiko amashirahamwe adaharanira ivyicaro vya poritike yandikiye umushikiranganji w’intwaro yo hagati mu gihugu Edouard Nduwimana, bamusavye ko yokwubahiriza amategeko mu kureka ayo mashirahamawe akagira urugendo rwo gushigikira Petero Karaveri MBONIMPA.

Urwo rugendo rutegekanijwe ku munsi wa gatanu igenekerezo rya 20 Ruheshi 2014. Ayo mashirahamwe adaharanira ivyicaro vya poritike amenyesha ko atashimishijwe n’ukubona umukuru w’igisagara ca Bujumbura yarabankiye kugira urwo rugendo kuri uwu wa mbere. Ayo mashirahamwe akavuga ko Saidi Juma umukuru w’igisagara ca Bujumbura atisunzwe itegeko na rimwe mukubabuza urwo rugendo.

Tubibutse ko ishirahamwe FORSC ryari ryahamagariye abarundi kugira urugendo rw’amahoro ku munsi wa mbere igenekerezo rya 16 Ruhenshi. Aho akaba ari mu ntumbero yo gusaba irekurwa ry’amukuru w’ishirahamwe APRODH, Petero Karaveri MBONIMPA. Iryo shirahamwe FORSC rikaba ryaciye rimenyesha ko urwo rugendo rwasivye kuko umukuru w’igisagara ca Bujumbura, Saidi JUMA yanditse ikete rimenyesha ko urwo rugendo rutarekuwe. Ivyo rero mw’ishirahamwe FORSC bakavuga ko ari ukudatahura uko amategeko avuga.

Vital Nshimirimana, arongoye FORSC (Forum pour le Renforcement de la Societé Civile)

Vital NSHIMIRIMANA yibutsa ko uko amategeko agenga imyiyerekano n’amanama atunganijwe, urugendo bararumenyesha gusa. Ivyo rero bakaba barabikoze, bararumenyesheje ariko si ugusaba uruhusha. Arongera kandi agashikiriza ko hakiri ingorane kuko bavuze "urugendo rw’amahoro" benshi babifata nk’imigumuko, nk’ukumenja.

Muri ayo mashirahamwe bizeye ko Edouard Nduwimana, umushikiranganji w’intwaro yo hagati mu gihugu atazobuza urwo rugendo rw’amahoro rutegekanijwe kuri uwu wa gatanu igenekerezo rya rya 20 Ruheshi 2014.