Amashirahamwe ataho yegamiye muvya politike asabwa kudafatira mu kivunga

Mu majambo yashikirije, umushikiranganji w’intwaro yo hagati mu gihugu, Edouard Nduwimana yarasavye amashirahamwe ataho yegamiye muvya politike kureka gufatira hamwe ibivuzwe vyose, bivuye ku makosa yakozwe n’urwaruka « Imbonerakure » rwo mu mugambwe CNDD FDD uri ku butegetsi.

Ku bwiwe, abanyapolitike bamwe bamwe barifatira ikibazo c’urwaruka rw’Imbonerakure ku bijanye na politike, muri kino gihe tugira twinjire mu matora yo mu mwaka w’2015.

Mu kiganiro yagiranye n’abari mu mashirahamwe ataho yegamiye muvya politike, umushikiranganji w’intwaro yo hagati mu gihugu yamenyeshe ko mu gihe urwo rwaruka «Imbonerakure » rwokora ibidahwanye n’amategeko, ruzokurikiranwa umwe wese ukwiwe, ku gatwe kiwe.

Abaserukira ayo mashirahamwe barerekanye ko banezerejwe n’ico kiganiro n’umushikiranganji, baca baboneraho n’akaryo ko kumusaba ko boteguzwa n’imiburiburi iminsi 15 imbere y’uko ibikorwa vyo kugenzura ivy’ ubuyobozi n’ubutunzi bikorwa.