BNUB irashima ugutahuka kwa Rwasa Agathon n’abandi banyepolitike

Ubuserukizi bw’ishirahamwe mpuzamakungu ONU mu Burundi burashima umuzo wa Rwasa Agathon n’abandi banyepolitike b’abarundi nka Alexis Sinduhije, Pascaline Kampayano bose bari bahunze inyuma y’umutekano muke waranze amatora yo mu mwaka w’2010.

Mw’itangazo basohoye ku munsi w’ejo, BNUB (Bureau des Nations Unies au Burundi) irakeza Leta ku cuka ciza catumye abo banyepolitike batahuka, ubu bakaba bariko barabandanya ibikorwa vyabo vya politike.

BNUB yaboneyeho n’akaryo ko gutera intege abanyepolitike mu Burundi, ibipfuriza gukorera hamwe, n’umutima wo gukunda igihugu, mu ntumbero yo gutegura neza amatora yigenga, yizewe, yo ku mugaragaro ategekanijwe mu mwaka w’2015.

Ku ruhande rwayo, BNUB yiyemeje ko mu kiringo ifise mu Burundi izokwama ishigikira utwigoro two gutsimbataza ikiyago ca politike gihuza bose, intwaro rusangi, amahoro n’iterambere rirama.