Buganda: Imbonerakure zagirizwa guhohotera umwana w’umwigeme

Abanyagihugu bo muri komine ya Buganda mu ntara ya Cibitoke baridogera urwaruka rwo mu mugambwe uri ku butegetsi CNDD FDD, ko urwo rwaruka rusigaye rwigenza nk’aho ari rwo rwasubiriye inzego z’umutekano.

Ivyo abo banyagihugu bakaba babivuze mu gihe kuri uyu wa gatandatu, imbonerakure zasimbiye ku mwana w’umwigeme yitwa Odette Irakoze ziramukubita zirambikako n’agahiri, zimwagiriza ko yivye amafaranga ibihumbi 160 uwo yahora afasha akazi ko mu nzu.

Ishirahamwe rihurikiyemwo abakenyezi bo muri komine ya Buganda, bakaba basaba ko amatohoza yogirwa, imbonerakure izokwagirwa n’icaha co gusinzikariza ubuzima uyo mwana w’umwigeme, iheze ihanwe bimwe vy’akarorero. Abanyagihugu baho i Buganda, bakaba basaba abarongoye umugambwe ku rwego rw’igihugu gukurikiranira hagufi ibikorwa vy’urwo rwaruka rw’imbonerakure, kuko bigaragara ko zishaka gusubirira inzego z’inyamiramabi, mu kwihanira abanyagihugu, kandi ataburenganzira babifitiye.