Umugambi w’imisegetera wahindutse gutanga intererano yo kwubaka ingoro ya CNDD-FDD

Mu gihe bari batumweko kugira babwirwe ibijanye n’itangwa ry’imisegetera ku musozi wa Butavuka zone Muzinda komine Mpanda intara ya Bubanza, basanze nyabuna ari ukumenyeshwa ibijanye n’intererano y’inyubakwa y’ingoro y’umugambwe CNDD FDD.

Nk’uko aya makuru tuyakesha bagenzi bacu bakorera iradiyo Isanganiro, abo banyagihugu bakaba bamenyeshejwe n’umwe mu rwaruka rw’Imbonerakure za CNDD FDD, ko umukozi wa Reta wese w’umugumyabanga wa CNDD FDD abwirijwe gutanga amafaranga igihumbi, nayo umunyagihugu asanzwe nawe agatanga amafaranga amajana atanu.

Abanyagihugu bari bitavye iyo nama y’uguhabwa imisegetera bagasanga n’uguterera kugira umugambwe wubakirwe ingoro, bavuga ko batewe ubwoba ko, umunyagihugu wese atazotanga iyo ntererano yaba umugumyabanga waCNDD FDD canke uwundi ibihano bitegekanijwe, ndetse ayo mahera akazotozwa umuhana ku muhana, nk’uko babishikirijwe n’iyo mbonerakure ya CNDD FDD.

Mukamenya ariko ko ivyakozwe n’uyo ari mu Mbonerakure kuri uyo musozi, vyakiriwe nabi mu rwego rw’Imbonerakure ku ntara. Ku bwa Methode Kubwimana umukuru w’Imbonerakure ku rwego rw’intara ya Bubanza, akaba amenyesha ko uwagize ivyo yakoze amakosa, ndetse ivyo yavuze bikaja ku gatwe kiwe, ntivyagirizwe Imbonerakure. Abandanya ahumuriza ko amafaranga yo kwubakwa ingoro z’umugambwe muri iyo ntara, azotangwa ku bushake bw’umuntu.