Ibice 10 kw’ijana nivyo biraje ishinga umurwi w’abashingamateka b’abatwa

Inyuma y’aho abatari bake batanguye gushikiririza amakenga ku nteguro y’ibwirizwa nshingiro rishasha, iyo nteguro yoba iza yamaze gushikanwa mu nama nshingamateka. Abari mu murwi w’abashingamateka b’abatwa basaba ko hoba ibiganiro, mu ntumbero yoguhuriza hamwe n’abarundi bose mu budasa bwabo bwa poritike ku cokorwa.

Mu murwi w’abashingamateka b’abatwa rero bakaba bavuga ko ico bipfuza ari ukwo iyo nteguro yirwa na bose, harimwo imiryango ya poritike yose, eka na bo nyene, hatibagiwe abari mu mashirahamwe ataho yegamiye mu vya politike. Mu gihe muganga Yohani Minani arongoye umugambwe Sahwanya Frodebu Nyakuri yasavye abo bari kumwe mu nama nshingamateka ko iyo nteguro y’itegeko itokwemezwa, Alfred Ahingejeje akaba ashimikira ku biganiro, no kudakoresha inguvu mu gihe haba hari ikibazo kiraba abanyagihugu bose.

Muri iki gihe rero, abari mu murwi w’abatwa bakaba baherutse kwandikira ikete umukuru w’igihugu aho bavuga ko boronswa ibice icumi kw’ijana, bakareka kwama bahabwa ibitigiri gusa vy’abantu babaserukira mu nama nshingamateka na nkenguzamateka. Bipfuza ko boza bararonswa ababaserukira muri Reta, n’abandi bose mu bibanza bindi vya poritike. Kuri ivyo nyene abantu bakaba batanguye kwibaza ko iyo nteguro nshasha y’ibwirizwa nshingiro, umugambwe CNDD FDD woshobora kuronsa ivyo uyo murwi w’abatwa usaba, abashingamateka batatu bafise bagaca bashigikira iyo nteguro, hagasigara habura umushingamateka umwe gusa, uyo nawe umugambwe CNDD FDD bakaba bomwironderera ukundi, abahingamateka bane babura kugira iyo nteguro ije mu ngiro, bakaba barakwiye.

Kuri ico kibazo, ntaco Alfred Ahishakiye arongoye umurwi w’abashingamateka babatwa akivugako, mu gihe umwanya n’umwanya bashobora guhamagarwa n’umukuru w’igihugu kugira bamubarire ibijanye n’ivyo basaba mw’ikete ryabo.