Ikigo OBR kiramutswa umukomiseri mukuru mushasha

Ikigo gitoza amatagisi OBR kiramutswa umukomiseri mukuru mushasha Dr Philippe Domitien Ndihokubwayo, uwo nawe akaba asubiriye Holmès Kieran aheruka kurangiza ikiringo ciwe c’imyaka ine.

Domitien Ndihokubwayo, umukomiseri mukuru mushasha w’ikigo OBR afise impyamabushobozi (doctorat) yaronkeye mu gihugu c’Ubudagi muri kaminuza westfalische wilhems –universitat Munster. Domisiyano Ndihokubwayo yize ibijanye n’imico n’ubwoko (ethnologie ) ,(ibijanye n’imibano (sociologie ) hamwe na Economie Politique. Kuva mu mwaka w’2005 gushika mu mwaka w’2007 yakorera ishirahamwe Care international, yararongoye kandi umurwi wari ujejwe kurondera ku vyerekeye ikibazo c’amatongo mu Burundi, imbere y’uko aja kuba ico bita’’ doyen’’ mu gisata c’amategeko, ivyigwa vyerekeye ubutunzi hamwe n’intwaro muri kaminuza y’i Ngozi.

Kuva mu kwezi kwa Ndamukiza 2004 gushika mu kwezi kwa Nyakanga 2010, abifadikanije n’ibikorwa vyo guhanura ico bita mu rurimi rw’igifaransa’’ consultance’’, yarakoze kandi nk’umwigisha mu vyigwa bijanye n’itunganywa ry’amashirahamwe (management, gestion des petites et moyennes entreprises , Entrepreneuriat, gestion des ressources humaines) n’ibindi. Domitien Ndihokubwayo yashitse mu kigo OBR avuye mu bushikiranganji bujejwe iterambere ry’amakomine (Ministère du plan et du développement communal) aho yari umunyamabanga ntayegayezwa guhera mu kwezi kwa Nyakanga 2010.

Tubamenyeshe ko Domitien Ndihokubwayo umukomiseri mukuru mushasha w’ikigo gitoza amatagisi OBR asubiriye umuzungu Holmès Kieran, uwo nawe mu kwezi kwa Ruheshi akaba ariho yarangiza ikiringo ciwe c’imyaka ine. Domitien Ndihokubwayo akaba ari we yahora ari icegera ca Holmes Kieran. Ubu akaba amukoreye mu ngata.