Imbonerakure zisabwa guheba zikikura iceyi ziterwa n’abari muri zo

Umuhari wa JRR mu gisagara ca Bujumbura umenyesha ko urarajwe ishinga n’ivyo wumva hirya no hino mu gihugu aho, mu gihe amashirahamwe yigenga ariko aratanga inyigisho nziza z’inyifato ibereye, urwaruka ruhurikiye mu migambwe rwofata ; abandi baba bariko barahungabanya umutekano.

Umushingwamanza Patrick Nitegeka arongoye JRR i Bujumbura

Nk’uko umushingwamanza Patrick Nitegeka abimenyesha mw’itangazo yashize ahabona, amenyesha ko umuhari Mparaniramajambere wa Rwagasore uteye ivyatsi ibimaze iminsi bishika mu ntara ya Kirundo, aho urwaruka rwo mu migambwe ya UPRONA, ADC-IKIBIRI, FRODEBU-Nyakuri rumaze imisi rusotorwa n’urwaruka rw’Imbonerakure ruhurikiye mu mugambwe CNDD-FDD.

Batanga nk’akarorero ko muri Komine Kirundo, aho urwaruka rwa Frodebu umunani rwakubiswe, murabo babiri bagakomereka cane. Akandi karorero ni aho muriyo ntara nyene, urwaruka rwa UPRONA rwamaze imisi rutarara mu mihana iwabo, mu ntumbero yo kwicungera ibitero vy’izo Mbonerakure. Iyo nyifato rero y’urwo rwaruka rw’Imbonerakure rusotora abandi bahurikiye mu yindi migambwe, ikaba iterwa ivyatsi. Aba JRR bagasaba urwaruka rw’Imbonerakure rwoba rutahura akamaro k’ubumwe n’umutekano mu gihugu, ko bohaguruka bakarwanya inyifato mbi ya bene wabo, bahungabanya umutekano w’abandi, kuko igihugu ari ica bose; kandi bamenye ko guhungabanya umutekano, uba uriko urisamburirako ! « Ahari umugabo hashira umugayo».

Imbonerakure za CNDD FDD

Muri iryo tangazo bagira bati :’’Twizera ko mu muhari w’imbonerakure hatabuze abaseserejwe nico ceyi bambikwa uko bukeye uko bwije. Tubasavye kuvyura akaranga k’ubuntu n’ubushingantahe kugira iryo bara rihagarikwe mu gihugu. Tuboneyeho akaryo ko gukeza urwaruka rwo muri Kaminuza y’uburundi ko rwashoboye gufundika ijambo ruri hamwe naho ruva mu migambwe itandukanye. Ivyo vyerekana ko rwatahuuye yuko burya turi bamwe, ingorane iyo zidushikiye ntizivangura Imbonerakure n’abandi.’’

Umushingwamanza Nitegeka Patrick arangiza amenyesha ko akarorero k’ubumwe abanyeshure bo muri za kaminuza za Reta berekanye, kari gakwiye kubera icigwa urwaruka ruri mu ntara, kugeza no mu mitumba. Basaba Reta kunyarutsa gusubiramwo ingingo yafashe kugira abana b’Uburundi basubire ku bikorwa.
Basaba kandi amashirahamwe yigenga yihaye intumbero yo kwigisha inyifato ibereye urwaruka ruhurikiye mu migambwe, ko atocika intege mu gikorwa ciza bariko barakora, narirya turi mu bihe bitoroshe vyo kwitegurira amatora.