Imigambwe niyo ikemura ubwayo ibibazo ifise

Imigambwe irangwamwo ukutumvikana yahamagariwe kuja hamwe igatorera umuti ibibazo vyayo kuko umukuru w’igihugu arengeye kwinjira mw’itunganwa ry’iyo migambwe mu bibazo vyayo.

Haraheze iminsi itatu gusa Rwasa Agathon yandikiye umukuru w’igihugu amusaba ko umugambwe FNL wosubizwa indongozi zavuye mw’ikoraniro kaminuza ryabaye ku genekerezo rya 28 na 29 Munyonyo 2009 ryashizeho Rwasa Agathon nk’umukuru w’uwo mugambwe, kuko atemera ikoraniro kaminuza ryabaye mu mwaka w’2010, n’iriheruka kuba rigashiraho Bigirimana Yakobo nk’umukuru w’uwo mugambwe.

Yishura kuri iryo kete ryarungikiwe umukuru w’igihugu Petero Nkurunziza, Willy Nyamitwe, icegera c’umuvugizi w’umukuru w’igihugu amenyesha ko ukutumvikana, n’ukudahuriza kubona ibintu co kimwe bitari mu mugambwe FNL gusa, kuko biboneka no mu yindi migambwe nka UPRONA na FRODEBU, ariko ko imigambwe ariyo ikwiye gukoranya abanywanyi bayo bagaheza ibibazo vyayo.

Willy Nyamitwe, icegera c’umuvugizi w’umukuru w’igihugu

Kubwa Willy Nyamitwe, icegera c’umuvugizi w’umukuru w’igihugu, umwanya wose umugambwe utaba wiyunze, biragorana ingene abanywanyi bawo bowubaka, icibagiwe co ni ingene bokwubaka igihugu n’umugambwe wabananiye. Urwego rw’umukuru w’igihugu ruhanura imigambwe kwumvikana kugira ishobore kwitegurira amatora yo mu mwaka w’2015.

Rwasa Agathon n’ubu avuga ko akiramutswa umugambwe FNL yaheruka kurungikira umukuru w’igihugu urwandiko rwateweko umukono n’abantu 67 297. Muri urwo rwandiko, basaba umukuru w’igihugu ko umugambwe FNL wosubizwa indongozi zavuye mw’ikoraniro kaminuza ryashizeho Rwasa Agathon nk’umukuru w’uwo mugambwe, kuko ayandi makoraniro kaminuza yabaye inyuma batemera ivyavuyemwo.