Inama nshingamateka yemeje integuro z’amategeko zibiri

Inama nshingamateka yemeje ata n’umwe avuyemwo, integuro z’amategeko abiri kuri uno wa gatatu igenekerezo rya 26 Munyonyo.

Muri izo nteguro imwe iraba iyemezwa ry’amategeko agenga ifaranga rimwe mu karere k’ Afrika y’ubuseruko, iyindi nteguro yitegeko ikaba iraba ukwemeza amasezerano hagati y’igihugu c’ Uburundi hamwe n’ishirahamwe ribuza abakoresha ibigwanisho bicira ubumara OIAC (Organisation pour l’interdiction des armes chimiques).

Ku cerekeye integuro y’itegeko iraba ikoreshwa ry’ifaranga rimwe mu karere k ‘ Afrika y’ubuseruko ,abashingamateka bashatse kumenya nimba igihugu c’ Uburundi kizoba caramaze kuriha imyenda gifitiye ibanki nkuru y’igihugu . Umushikiranganji w’intwaro ibereye yishuye ko bishoboka kuko ivyo bihugu biri mu karere k’ Afrika y’Ubuseruko bifise ikiringo co gushika mu mwaka w’2024 kugira bazobe bujuje ibisabwa vyose.

Uwaserukiye Reta y’ Uburundi muri ivyo bikorwa mu nama nshingamateka yamenyesheje ko Reta y’ Uburundi ifise umwenda w’amafranga ugera ku 667.581.000.000 y’amarundi muri ayo 468.148.000.000 akaba arayo ifitiye ibanki nkuru y’igihugu.

K’ubwo umushikiranganji ajejwe intwaro ibereye, Ernest Mberamiheto, ngo birashoboka ko Uburundi bushobora kuba bwikuyeko uwo mwenda mu myaka icumi iri mbere , imbere y’uko haba ishirwaho ryo gukoresha ifaranga rimwe muri bino bihugu bigize akarere k’ Afrika y’ubuseruko.