Indege igendeshwa n’izuba yarashitse mu gisagara ca Phoenix

Umudereva w’umuswisse yarurutse n’indege yariko aratwara mu gisagara ca Phoenix, mu ntara ya Arizona.

Iyo ndege yururutse muri ico gisagara co mu bumanuko bushira uburengero bwa Leta zunze ubumwe za Amerika, ku kibanza c’indege ca mbere. Uwo mudereva akaba yaciye aho muri Phoenix mu gihe ari mu rugendo ruzomushikana mu ntara zitandukanye zo muri Amerika, ariko atwara iyo ndege igendeshwa biciye kuri énergie solaire, arivyo twokwita ubushobozi buvuye mu mishwarara y’izuba.

Uwo mudereva yiyemeje kugerageza ubwo buhinga bushasha. Bertrand Piccard, yururutse ku kibanza c’indege isaha zitandatu z’ijoro mu mwijima: bwari bubaye ubwa mbere indege itwarwa na énergie solaire iguruka ku murango hamwe no mw’ijoro.

Urwo rugendo rwari rumuvanye mu ntara ya North Carolyne, rukaba rwafashe amasaha 20, kuko indege yagenda ibirometero 49 kw’isaha.

Umushingantahe Piccard hamwe n’uwundi mudereva agira kabiri, André Borschberg bazoguma bakiranwa, bakaba bazomara igihe kirekire mu gisagara ca Phoenix, Dallas, St. Louis na Washington, imbere y’uko bafata urugendo rwa nyuma ruzobashikana mu gisagara ca New York mu kwezi kuza.