Integuro y’itegeko isubiramwo amafaranga Reta ikoresha yatowe hari abasohotse

Inama nshingamateka yemeje integuro y’itegeko isubiramwo amafaranga Reta izokoresha. Ayo mafaranga akaba agera ku mafranga y’amarundi agera ku miriyaridi 1400, ni ukuvuga ibice 3 kw’ijana vy’amafranga Reta izokoresha.

Ku muhingamo wo kuri uno wa gatatu, igenekerezo rya 30,abashingamateka bize bongera baremeza integuro y’itegeko isubiramwo amafranga Reta izokoresha. Ariko rero abatari bake yaba abo mu mugambwe utavuga rumwe n’ubutegetsi hamwe no mu mashirahamwe adaharanira ivyocaro vya poritike, babona ko iyo nteguro ije kunigira mu mpeshi umunyagihugu yarasanzwe akenye. Umushingamateka wo mu mugambwe Frodebu Nyakuri yamenyesheje abamenyeshamakuru ko atashoboye kwitaba ivyo bikorwa, kuko inyungu z’abanyagihugu zitafatiweko. Ku bwiwe iyo nteguro y’itegeko ije gutuma ubuzima bw’umunyagihugu buzimba gusumba. Agira ati :’’ Iyo abantu bakenye baratubika umukanda, na Reta rero iyikenye yari ikwiye gutubika umukanda, aho kuja kuyarondera mu banyagihugu.’’

Gabriel Rufyiri arongoye ishirahamwe OLUCOME nawe nyene abandanya yiyamiriza iyo nteguro y’iryo tegeko, ku bwiwe ije guhamba umunyagihugu kuko ije reta ije gusaba amakori abantu batayafise agira ati :’’ Reta iguma irondera na ntaryo kununuza umunyagihugu ,iyo nteguro y’itegeko kandi igarukana ingingo zafashwe mu gihe c’intambara mu mwaka w’1998. Ivyo rero bisa n’ugukama inka ataco wayigaburiye, uba uriko wica ibere’’. Ndetse umukuru wa OLUCOME yashimiye abashingamateka bataritoye .

Tubamenyeshe ko abashingamateka 81 nibo baritoye, 13 bararihakana, hamwe n’umwe atagize ico arivuga ko. Tubamenyeshe kandi ko iyo nteguro y’amafranga Reta izokoresha yatowe abashingamateka bo mu mugambwe FRODEBU Nyakuri n’umugambwe UPRONA basohotse.