Ishami rya UPRONA ritemewe na Reta ribona nk’inkinamico igihano cafatiwe Karori Nditije

Mu mugambwe UPRONA ishami ritemewe n’ubushikiranganji bw’intwaro yo hagati mu gihugu bavuga ko ingingo yafatiwe umushingamateka Karori Nditije itagira ishingiro, kuko igihano cafashwe n’uwutabifitiye uburenganzira.

Concilie Nibigira, umukuru w’umugambwe UPRONA yemewe na Edouard Nduwimana umushikiranganji w’intwaro yo hagati mu gihugu, yafashe ingingo yo kwirukana mu mugambwe UPRONA umushingamateka Karori NDITIJE avuga ko ariwe aramutswa uwo mugambwe wa Rwagasore. Karori Nditije yagirizwa na Concilie Nibigira ivyaha 16 bigizwe ahanini n’ugusesagura amatunga y’umugambwe (mbere akavuga ko agiye kumwitwarira mu butungane), gucanishamwo imboneza za UPRONA i Muramvya (amwagiriza ko yazibujije gutegura umusi mukuru w’ukwigina imyaka 52 Uburundi bumaze bwikukiye). Karori Nditije yagirizwa kandi gukura abaserukira umugambwe UPRONA mu nzego za Reta, kiretse mu nama nshingamateka kuko ari muriyo.

Ku ruhande rw’ishami rya UPRONA ritemewe n’ubushikiranganji bw’intwaro yo hagati mu gihugu, basanga iyo ngingo yafatiwe Karori Nditije umukuru w’iryo shami, itagira ifatiro. Tasiyano SIBOMANA, avugira umugambwe UPRONA urongowe na Karori NDITIJE, amenyesha ko iyo ngingo ari nk’inkinamico. Kubwa Tasiyano SIBOMANA, umuvugizi wa UPRONA ishami ritemewe na Reta, Concilie NIBIGIRA nta burenganzira afise bwo gufata iyo ngingo yo kwirukana mu mugambwe Karori NDITIJE. Nk’uko abandanya abisigura, mu makosa ashobora gutuma umudasigana yirukanwa burundu mu mugambwe, nta na rimwe umushingamateka Karori NDITIJE yakoze.

Tasiyano SIBOMANA, umuvugizi w’umugambwe UPRONA, ishami ritemewe na Edouard NDUWIMANA

Tubamenyeshe ko mu gihe iyo ngingo yo kwirukana Karori NDITIJE yoshirwa mu ngiro, uwo mukuru w’umugambwe atemewe n’ubushikiranganji bw’intwaro yo hagati mu gihugu ashobora guca atakaza ikibanza afise mu nama nshingamateka. Iyo ngingo yo kumwirukana mu mugambwe UPRONA yafashwe na Concilie NIBIGIRA ku genekerezo rya 30 Ruheshi 2014, mu gihe bwaca mu Burundi bahimbaza imyaka 52 iheze umuganwa Rudoviko Rwagasore aronkeje intahe y’ukwikukira igihugu c’Uburundi.