Ishirahamwe PAM rigiye gutanga ku Burundi imiriyoni 61 z’amadorari

Umugambi wo kugaburira abana ubasanzwe ku mashure watangujwe mu Burundi, kimwe mu biganiro vyahuje umushikiranganji Laurent Kavakure na Bienvenu Djossa aserukira ishirahamwe PAM mu Burundi.

Bienvenu Djossa aserukira ishirahamwe ryitaho ibifungurwa kw’isi PAM mu Burundi kuri uyu wa mbere wa 17 Ruhuhuma 2014, yarakiriwe n’umushikiranganji w’imigenderenire n’ayandi makungu Lauren Kavakure. Mu vyo baganiriye, hakaba harimwo umugambi wishinze kugaburira abana ubasanze ku mashure watangujwe hano mu Burundi hamwe n’ikibazo c’umuporisi w’i Ngozi yidengemvya, inyuma yaho sentare ntahinyuzwa y’i Ngozi imuciriye igihano co gupfungwa. Ico gisongerezi c’umuporisi kikaba cagirizwa guhohotera ubuzima bw’umwe mu bakozi b’ishirahamwe PAM, yarasanzwe akorera mu ntara ya Ngozi.

Bienvenu Djossa akamenyesha ko yarazanye ubutumwa yarungikanywe n’umuyobozi nshingwabikorwa w’ishirahamwe PAM. Ubwo butumwa bukaba bwari ubwo kumenyesha Reta y’Uburundi ko, ishirahamwe PAM rigiye kuzotanga imiriyoni 61 z’amadorari y’abanyamerika mu mugambi wayo mushasha w’ I 2012-2016. Uyo mugambi ukaba uhuye n’umugambi w’igihugu wo kurwanya ubukene (CSLP2).

Laurent Kavakure umushikiranganji w'imigenderanire y'Uburundi

Ku kibazo cico gisongerezi co mu giporisi c’i Ngozi naco, acidegemvya mu gihe yaciriwe igihano co mu nyonyoro, umushikiranganji Laurent Kavakure akaba yemeye ko agiye kweregera abarongozi babijejwe, kugira bacige mu maguru masha.
Akaba yasavye PAM hamwe n’ayandi mashirahamwe mpuzamakungu akorera hano mu Burundi, kubandanya bizera Uburundi mu kungene budahengeshanya gushitsa amaserano baba bagiriraniye hamwe nabo.