Kubwabafana Igiteramo ca Fizzo na Lolilo ni icambere muri uyu mwaka

Igiteramo ca Big Fizzo na Lolilo cari kirindiriwe n’abantu benshi kuko hari haheze igihe kitari gito abo baririmvyi bompi badakorana igiteramo. Ikibazo nyamukuru cabaye ubuto bw’aho cari gitegekanijwe kubera kuko abantu bari hanze barusha ubwinshi abinjiye. Abashoboye kwinjira nabo nyene ntiborohewe kuko imbere hari huzuye cane ku buryo no kuronka aho uhagarara vyari ikibazo.

Zimwe mu mvo zatumye ico giteramo gifatwa ku rwego rwo hejuru kandi kikitabwa n’abantu isinzi bavuye impande zose z’igisagara, ni uko abo baririmvyi uko ari babiri, umwe wese yashaka kwereka uwundi ko amusumvya ubuhinga n’abakunzi. Twibutse ko bari bivugiye ubwabo imbere y’uko igiteramo kiba, ko abafana aribo bazogaragaza ukuri.

Lolilo niwe yari ategekanijwe gutangura kuririmba ariko vyaragaragaye ko atarivyo ubwiwe yipfuza, kuko babaye bakibimubwira, aca yishura ati« Big Fizzo ni abe ariwe atangura», baraharira ivyo bica vyerekana ko kuba Lolilo yashitse acererewe, yari yateguye kuririmba ubwa nyuma, kuko abamenyereye ivy’umuziki bavuga ko umuririmvyi aririmvye ubwa nyuma aba afise amahirwe menshi yo kwereka abarorerezi ko yarushije ubuhinga uwo bahiganwa kanatsinda aba yamaze kumenya ingene yokwifata yisunze ivyakozwe na mugenzi we bahiganwa.

Big Fizzo, ari nawe yatanguye kuririmba yakiriwe n’amashi menshi, abantu bose barahaguruka bati« twari tugukumbuye urakaza neza». Nawe rero si ukuririmba yivuye inyuma ku buryo abakunzi biwe bamwe barize amosozi y’umunezero n’inkumbu.

Ageze ku ndirimbo yiwe yitwa” nakulove” ari nayo yari nk’iy’icitabirizo ya Fizzo, abantu bayiririmvye hamwe nawe bikomeye kuko abakunzi biwe bashaka kwerekana ko iyo ndirimbo ariyo ikundwa cane kuri” Uri uwa mbere” ya Lolilo.

Lolilo nawe hageze umwanya wiwe, abakunzi bamwakirije nawe nyene amashi menshi hama abona gutangura kuririmba binezera benshi. Yageze ku ruririmbo rwiwe rwitwa “uri uwa mbere” abakunzi b’umuziki bari bakoraniye ngaho bakiririmba “Nakulove” ya Big Fizzo. Iryo shaka abo baririmvyi bompi bari bafise ryatumye bateramisha abantu barahimbarwa kuko muvy’ukuri ubiravye neza usanga muri rusangi abo baririmvyi bompi bakundwa na benshi .

Uravye neza kandi kubijanye n’ivyo bari bivugiye ko abafana aribo bazokwerekana uwukunzwe kuruta uwundi, vyarigaragaje ko Fizzo afise abakunzi benshi gusumba Lolilo kandi ko “nakulove” ikundwa cane kuruta” Uri uwa mbere”.

Ku bijanye n’ukurabira hamwe ko ico giteramo coba caratumye bahava bumvikanye siko biri kuko igiteramo giheze, ikinyamakuru canyu Igihe Limited carabasavye gufata amasanamu bari kumwe, Fizzo aravyemera aho yishuye ati « ntakibazo», Lolilo nawe aravyanka mukuvuga n’ayandi majambo menshi agaragaza umubabaro wiwe.

Twibutse ko ico giteramo cabereye ahitwa Iwabo w’abasigaye muri komine Kamenge, kikaba categuwe n’ Ubunywero«Iwabo w’Abasigaye» mu ntumbero yo kunezereza abakunzi b’umuziki w’Uburundi.