Kutariha amakori ntivyubahiriza amategeko-PARCEM

Charles Nihangaza yarashize ahabona ivyavuye mu cigwa yakoze agitumwe n’ishirahamwe PARCEM riri kumwe na Action Aid Burundi aho yamenyesheje ko kutariha amakori ku bantu bamwe bamwe no ku mashirahamwe amwe amwe biza gutuma haba ukutubahiriza amategeko.

Ivyo vyashikirijwe n’umuhinga Charles Nihangaza umuhinga muvyo ubutunzi akaba yarigeze kuba umushikiranganji w’ubutunzi aba kandi umuyobozi w’amakori.Charles Nihangaza yarakoze icigwa ku bijanye n’ubutungane muvyo amakori hamwe n’ubutunzi abitumwe n’ishirahamwe PARCEM riri kumwe na Action Aid Burundi.

Kubwa Charles Nihangaza ngo ibice 73 kw’ijana vy’amafaranga atozwa na OBR ava mu miryango ivyo navyo bikaba ari nk’akarenganyo kuko abanyagihugu hamwe n’amashirahamwe yoyo aronka inyungu atategerezwa kurihishwa ama tagisi co kimwe n’imiryango idafise ibikorwa vyinjiza amafaranga.

Kuri ivyo rero Charles Nihangaza asaba ko hoba amafaranga arihwa ku ngo zozo zidafise aho zikura amafaranga mu gihe hoba ayandi arihwa n’abafise ibikorwa vyinjiza amafaranga.