Léonard Nyangoma arataha mu gihugu vuba cane

Mu nama yariko ihuza abarongoye umugambwe CNDD ( Conseil National pour la Défense de la Démocratie) urongowe na Léonard Nyangoma, ku munsi w’ejo kuw’Imana, urwego nshingwabikorwa rw’uwo mugambwe rwamenyesheje ko Léonard Nyangoma agiye nawe gutaha mu gihugu, aze gutunganya umugambwe n’ukwitegurira amatora yo mu mwaka w’2015.

Muri iyo nama yariko ibera mu Rumonge, mu ntara ya Bururi, ubwa mbere kuva umugambwe CNDD wikuye mu matora y’amakomine yo mu mwaka w’2010, Charles Niyungeko ari mu rwego nshingwabikorwa rw’uwo mugambwe yamenyesheje ko Léonard Nyangoma azoshika hagati y’impera za kuno kwezi n’intango y’ukwezi kwa Nyakanga buca dutangura.

Abari muri iyo nama bumvikanye gusubira kunagura uwo mugambwe wabo, inyuma y’imyaka itatu iheze ata huriro n’abanywanyi.
Kabaye kandi n’akaryo ko kumenyesha inzitizi babona zishobora gutosekaza amatora yo mu mwaka w’2015, nk’abagize umurwi CENI utegura amatora batumvikanweko na bose. Mu mugambwe CNDD rero bamenyesha ko bazoterera agacumu k’ubumwe mu nteguro y’itegeko rizogenga imigambwe mu matora yo mu mwaka w’2015.

Lénard Nyangoma, umukuru w’umugambwe CNDD