Accueil > Poritike > Madagascar : Marc Ravalomanana yashizwe ahacungerewe, ntiyahagaritswe
Madagascar : Marc Ravalomanana yashizwe ahacungerewe, ntiyahagaritswe
mardi 14 Gitugutu 2014
Uwahoze ari umukur w’igihugu ca Madagascar Marc Ravalomanana yaratahutse mu gihugu c’iwe inyuma y’imyaka irenga itanu ari mu buhungiro, ahejeje gutembagazwa ku butegetsi. Yashitse atawuvyiteze aho avuka, hagati mu gisagara i Antananarivo. Yararonse akanya ko guhura n’abanywanyi b’iwe hamwe n’abamenyeshamakuru imbere yo guhagarikwa.
Nk’uko abanywanyi b’iwe babimenyesha, Marc Ravalomanana yashizwe ahantu acunzwe, ariko mw’ijambo ryavuzwe ejo ku muhingamo n’umukuru w’igihu ca Madagascar, Hery Rajaonarimampianina, yemeza ko atahagaristwe canke afungwe ariko yashizwe mu kibanza umutekano w’iwe ucungererwa neza (mis en sécurité).
![](local/cache-vignettes/L512xH345/marc-ravalomanana-1-4b21c.jpg?1517991578)
Naho yavuze uko, bamufashe hakoreshejwe inguvu kuko abasirikare bashwiragije abanywanyi ba Marc Ravalomanana bakoresheje ivyuka bikoroza amosozi (gaz lacrymogène),imbere yaho yaba, babomora urugi bakoresheje amasasu, imbere yokwinjira bambaye ibibahisha mumaso (cagouls), hama baramufata.
Umukuru w’igihugu ca Madagascar, Hery Rajaonarimampianina avuga ko ukugaruka kwa Marc Ravalomanana yahoze ari umukuru w’igihugu, ari uguhusha inzira (un dérapage) kandi ko ijambo yashikirije agarutse ariry’agasotoro (de la provocation). Marc Ravalomanana akaba yavuze ko yaje adafise igitabo cinzira, yaje wenyene kandi ko atemera vy’ukuri ishirwa ku butegetsi rya Rajaonarimampianina arongoye Madagascar.
Abanywanyi b’iwe bavuga ko bababajwe cane n’ingene bafashe uwahoze ari umukuru w’igihugu kandi ko batazi aho bamujanye, bakaba bafise n’amakenga ku kigiye gushikira indongozi y’abo.
Nadege