Manwangari asaba ko Bamvuginyumvira yorekurwa mu maguru masha

Umurwi w’Abadasigana bavuga ko bishinze gusubiza umutamana umugambwe Uprona, basaba ko mu mugambwe CNDD FDD batofata abo batavuga rumwe nk’abansi, ahubwo bobafata nk’ababakebura, kugira igihugu kirongorwe neza

Yohani Batisita Manwangari asanzwe ari umwe muri abo badasigana, akaba avuze ivyo mu gihe Ferederiko Bamvuginyumvira yahoze ari icegera c’umukuru w’igihugu ubu akaba ari icegera c’umukuru w’umugambwe Sahwanya Frodebu, umugambwe utavuga rumwe na Reta ya CNDD FDD, apfungiwe mw’ibohero rikuru rya Mpimba.

Manwangari abandanya avuga ko ihagarikwa rya Bamvuginyumvira ata vyemeza bihari bikwiye riteye isoni, kandi ryambika iceyi igihugu, mu gihe uwo yahoze ajejwe amabanga ahambaye mu gihugu. Abatari bake mu mashirahamwe yigenga, bakaba bariko bemeza ko ifatwa ryiwe ritakurikijwe amategeko, kandi ko ryoba ari irementanya yagiriwe kugira izina ryiwe ryononekare ndetse n’ubushingantahe azwiko muri poritike y’Uburundi butosekazwe.

Mu murwi wishinze gusubiza umutamana umugambwe Uprona bakaba basaba umugambwe CNDD FDD gushira imbere intwaro rusangi basanzwe bashira imbere mu mugambwe wabo, mu guha iteka abigeze kuramutswa amabanga akomeye y’igihugu. Babona ko iyo ngendo ubutungane bw’Uburundi ndetse n’giporisi basa n’abayigize ubuhizi, kuko atari irya mbere abanyecubahiro ku rwego rwa Bamvuginyumvira, canke no ku rwego rw’abigeze kurongora igihugu barementanirizwa, bagapfungirwa mw’ibohero rikuru bazira ubusa.