Accueil > Amakuru > Poritike > Manwangari : Ukwo umukuru w’igihugu atowe kwose aba yuzuye”
Manwangari : Ukwo umukuru w’igihugu atowe kwose aba yuzuye”
mardi 10 Nyakanga 2013
Ijambo umukuru w’umugambwe CNDD-FDD yavugiye mu Gatumba mu birori vy’ukwigina imyaka itatu uyo mugambwe utsinze amatora, mu kiringo ca kabiri bamaze bari ku butegetsi, ryatumye abantu batandukanye bagira ico barivuzeko.
![](local/cache-vignettes/L314xH209/nyabnd-a871a.jpg?1517519244)
Mw’ijambo ryiwe rero, umushingamateka Pasikari Nyabenda asanzwe arongoye umugambwe uri ku butegetsi, yamenyesheje ko umukuru w’igihugu c’Uburundi Petero Nkurunziza, amaze gutorwa rimwe gusa, aho muri ico gihe yatowe n’abanyagihugu. Ico kiringo kikaba ari mu matora yabaye mu mwaka w’2010. Ku bwa Nyabenda rero, itorwa ry’umukuru w’igihugu mu matora yo mu 2005, Petero Nkurunziza yatowe n’abashingamateka barikumwe n’abakenguzamateka, ico kiringo kikaba kitoharurwa nk’uko umukuru w’umugambwe CNDD-FDD yabimenyesheje abagumyabanga bari bakoraniye muri ico kibanza.
Ku bwa Manwangari Jean Baptiste umunyepolitike w’umurundi yakurikiranye ibiganiro vy’i Arusha, avuga ko ukwo umukuru w’igihugu atowe kwose, aba yuzuye, atwara ari umukuru w’igihugu, ibiringo bikaba vyabindi. Mu kiganiro n’isamirizi ijwi ry’abanyagihugu RPA, Manwangari avuga ko hamwe Petero Nkurunziza, umukuru w’igihugu ku ncuro igira gatatu yosubiri kwitoza, azoba arenze amasezerano y’i Arusha, ndetse akazoba ahonyanze n’ibwirizwa nshingiro rya Republika y’Uburundi, kuko azoba atwaye ikiringo kigira gatatu. Asaba ko haba mu kiringo ciwe ca mbere aho Nkurunziza yatowe n’abaserukiye abanyagihugu, haba mu kiringo ca kabiri aho yatowe n’abanyagihugu, ivyo bitari bikwiye kuzana impari, kuko ikiringo ciwe carangiye, aho hose yitoje, akarongora igihugu ari umukuru w’igihugu.
![](local/cache-vignettes/L650xH330/pierre-nkurunziza-2-62cae.jpg?1517519244)
Ibijanye n’ukwitoza kw’umukuru w’igihugu Nkurunziza mu matora yo mu mwaka w’2015, vyagumye binurwanurwa haraheze iminsi itari mike, ariko wumvirije mw’ijambo rya Pasikari Nyabenda arongoye umugambwe uri kubutegetsi kuva mu mwaka w’2005, rirerekana ko umukuru w’igihugu Petero Nkurunziza ariwe ashobora kuzoserukira umugambwe CNDD-FDD mu matora buca aba.
Aristide Nizigire