’’Ntakori tuzosubira gutanga, abadandariza mu mabarabara batirukanywe n’abaporisi’’

Abadandariza ivyamwa n’ibifungurwa mu nyubakwa Grocery Store Fruits basaba ko igisagara ca Bujumbura n’ishirahamwe ryegeranya amatagisi ya Reta OBR kuba batokwirirwa baraza kubasaba amahera yo kuriha ikori, kuko atayo bafise, mu gihe abadandariza mw’ibarabara aribo badandaza, bo ivyo baranguye vyamaze kubaborana.

Abandariza muri iyo nyubakwa bakaba bavuze ivyo, mu gihe muri ino minsi ya Noel, batigeze badandaza kuko n’ivyo bari baranguye kugira baze babidandaze vyaboze. Aha bakavuga nk’ubwishaza, ibitunguru, ivyamwa, ibiharage bitoto n’ibindi. Baremeza ko abariko badandariza aho mu mabarabara y’igisagara ca Bujumbura benshi bafise ibibanza, ariko ubu bahevye kuhadandariza kuko babona atababashorera, maze baca bigira mu mabarabara.

Abo bakenyezi badandariza muri Grocery Store Fruits yahoze yitwa kera Le Grenier du Burundi, basaba abaporisi n’abajejwe igisagara kwirukana abo badandariza mu mabarabara, kugira basubire mu bibanza vyabo, abatabifise nabo bahabwe aho badandariza, atari aho naho, bamenyesha ko ata n’ikingoro bazoronka batangako ikori.

Abandandariza mu mabarabara y’igisagara ca Bujumbura bo, bamenyesha ko abaporisi mw’iyi minsi atagahengwe babaronkana, kuko bazana imiduga yabo gupakira ivyo baba babatse. Tukaba twonabamenyesha ko umwe muri abo bakenyezi badandariza nw’ibarabara yahatswe kuhasiga ubuzima muri iyo ndwi irangiye, igihe umuporisi yamucako ariko ariruka, agaca yikubita hasi, akaba yajanywe kwa muganga ari ikiruruma.