Accueil > Ubutunzi > Palais des arts : Ihayanishwa ry’ivyaranguwe n’amashirahamwe yoroherejwe na (...)
Palais des arts : Ihayanishwa ry’ivyaranguwe n’amashirahamwe yoroherejwe na API
lundi 10 Munyonyo 2014
Amashirahamwe arenga 5092 niyo amaze kworoherezwa gushinga imitahe mu Burundi kuva mu mwaka w’2012, biciye mu kigo kijejwe kworohereza abanyamitahe API, nk’uko bimenyeshwa na Antoine Kabura arongoye ico kigo.
Muri ayo mashirahamwe, imigambi yashoboye kuronka uturusho igera ku 291 nk’uko abandanya abimenyesha, mu gihe kuri uno wa mbere hatangura ihayanishwa ry’ivyaranguwe n’amashirahamwe yashoboye kworoherezwa n’ico kigo mu nyubakwa za Palais des arts. Ayo mashirahamwe akaba yaratumye havuka ubuzi kuko kw’ishirahamwe rimwe rivutse n’iburiburi haba hari akazi kamwe kabonetse.
Ku mashirahamwe rero ibihumbi bitanu, hashobora kuba habonetse ubuzi burenga ibihumbi bitanu nyene, nk’uko Kabura Antoine abandanya abishikiriza.
- Antoine Kabura, arongoye ikigo API
Ku ruhande rw’amashirahamwe yitavye iryo hayanishwa, barashima ibikorwa vy’ikigo API, iryo hayanishwa naryo bavuga ko ari ngirakamaro kuko ku bwabo ni akaryo keza ko guhayanisha ibidandazwa vyabo, bakongera bagashobora guhura n’abafasha (Partenaires).
Tubamenyeshe ko iryo hayanishwa ryitabwe n’amashirahamwe 30, harimwo SAVONOR, Tanganyika Sugar Industries, FARISANA rihingura ifu y’ingano yo gukoramwo ibitumbura imikate, amashirahamwe ahurikiye muri CFCIB, ishirahamwe FER-AL rikora amameza yo mu biro. Ayo mashirahamwe akaba yagabanije ibiciro muri iryo hayanishwa.
Tubamenyeshe kandi ko iryo hayanishwa rizomara iminsi itatu kuva kuwa 10 Munyonyo gushika kuwa 12 Munyonyo.
Floxella Karire
