"Sinshobora gushigikira CNDD FDD mu guhindura ibwirizwa nshingiro’’

Umugambwe Sahwanya Frodebu Nyakuri iragi rya Ndadaye urarahira ukarengwa ko udashobora gushigikira CNDD FDD mu ngendo yo guhindura ibwirizwa nshingiro rya Republika y’Uburundi, nk’uko bishikirizwa na muganga Yohani Minani awurongoye.

Igihe umukuru wa Frodebu Nyakuri umushingamateka Minani yariko arabonanira n’abarongoye uyo mugambwe mu Mabandantara intara ya Makamba, yavuze ko ibwirizwa nshingiro ryabonetse bigoranye, riboneka Uburundi burushe n’abarundi, ari naco gituma atamugambwe umwe rudende wokwihereranya iryo bwirizwa nshingiro. Minani rero akaba yabariye abarongoye abandi mu mugambwe wa Frodebu Nyakuri iragi rya Ndadaye i Makamba, ko badashobora gushigikira umugambwe uri ku butegetsi, ko ahubwo uyo mugambwe woja hamwe n’abandi banyepolitike bakarabira hamwe ico hinduka.

Muri urwo rugendo kandi yagize muri iyo ntara iri mu Bumanuko bw’igihugu, muganga Minani akaba yabariye abanywanyi biwe ko yipfuza ukwiyunga kw’amashami ava kuri Frodebu, ayo nayo akaba ari rimwe rya Frodebu Nyakuri arongoye, n’irindi rirongowe na Leonce Ngendakumana rya Sahwanya Frodebu. Yohani Minani akaba avuga ko ibiganiro vyari vyaratanguye, ariko haca haba utugorane, bituma igikorwa c’ukwiyunga kidakunda. Muri iki gihe rero, we akaba avuga ko vyoba vyiza uyo mugambwe wiyunze kugira amatora yo mu mwaka w’2015 aze abe bose barikumwe kandi kugira baze bashobore kuyategura neza.

Tukaba twobamenyesha ko iyo nama yegenze neza, ndetse n’abayitavye bakaba bamenyesha ko ataco inzego z’umutekano zabagize, mu gihe mu zindi ntara abanyepolitike bama batakamba ko bamwe mu baporisi bababuragiza, bakababuza kwigirira amanama, bakorohereza umugambwe uri ku butegetsi CNDD FDD gusa.